پاکستانی عازمین حج کا مدینہ منورہ پہنچنے کا سلسلہ جاری ہے اور جمعے کو بھی سرکاری اسکیم کے تحت آنے والے عازمین کا پاکستانی سفیر احمد فاروق اور ڈی جی حج عبد الوہاب سومرو کی جانب سے پرتپاک استقبال کیا گیا۔
مزید پڑھیں
استقبال کے دوران سرکاری عازمین حج کو تحائف اور پھول بھی پیش کیے گئے۔
اس موقعے پر خطاب کرتے ہوئے پاکستانی سفیر احمد فاروق نے کہا کہ عازمینِ حج کے لیے بہترین انتظامات کرنے پر وہ سعودی حکومت کے شکر گزار ہیں۔ انہوں نے امید ظاہر کی کہ عازمین حج بہترین نظم وضبط کا مظاہرہ کرکے ملکی وقار میں اضافہ کریں گے۔
ڈی جی حج عبدالوہاب سومرو کا کہنا تھا کہ اس سال سرکاری حج اسکیم کے تمام حجاج کو مدینہ منورہ کے مرکزی علاقے میں ٹھہرایا جائے گا اور پاک حج ایپ کے ذریعے عازمین حج سے سہولیات کے بارے میں فیڈ بیک بھی لیا جائے گا۔
انہوں نے یہ بھی واضح کیا کہ حجاج کی سہولت کے لیے وزارت نے متعدد شعبہ جات قائم کیے ہیں۔ ان کا کہنا تھا کہ حجاج رہنمائی کے لیے بلڈنگ معاون یا پاک حج موبائل ایپ پر رجوع کر سکتے ہیں۔
دوسری طرف حج ترجمان وزارت مذہبی امور عمر بٹ کے مطابق پاکستان سے مدینہ منورہ کے لیے حج پروازوں کا سلسلہ جاری ہے۔ انہوں نے بتایا کہ حج آپریشن کے پہلے 2 روز میں اب تک 2501 عازمین حج مدینہ منورہ پہنچ چکے ہیں۔
عازمین حج نے مسجد نبوی میں نماز جمعہ ادا کی۔ مسجد نبوی میں بڑھتے رش کے باعث چھت بھی نمازیوں کے لیے کھول دی گئی۔
