پی ٹی آئی کے نوجوان شہید ہوئے ہم کس چیز کی معافی مانگیں، عمر ایوب

تحریک انصاف کے جنرل سیکریٹری عمر ایوب نے کہا ہے کہ ہم پر تشدد ہوا ہے اور ہمارے نوجوان شہید ہوئے ہیں ہم کس چیز کی معافی مانگیں۔

فیصل آباد میں میڈیا سے گفتگو کرتے ہوئے جنرل سیکریٹری پی ٹی آئی اور قومی اسمبلی میں اپوزیشن لیڈر عمر ایوب نے کہا کہ شیر افضل مروت کو آج شوکاز نوٹس جاری کردیا ہے، اب شیر افضل مروت کے مستقبل کا فیصلہ بانی پی ٹی آئی عمران خان نےکرنا ہے۔

عمر ایوب نے کہا کہ ہم پر بوگس مقدمات ہیں اور اب ہم شامل تفتیش ہونے جا رہے ہیں، ملک کے حالات آپ کے سامنے ہیں، ان سے ملک چل نہیں رہا، موجودہ حکومت کے خلاف عدالتوں میں رٹ دائر کررہے ہیں۔

جنرل سیکریٹری پی ٹی آئی نے مزید کہا کہ گندم بحران میں 350 ارب روپےکا ٹیکہ لگایا گیا ہے، اس وقت محسن نقوی وزیراعلیٰ تھے اور ان کے ساتھ مسلم لیگ (ن) کے لوگ بھی شامل ہیں۔ ایک سوال کے جواب میں ان کا کہنا تھا کہ جماعت اسلامی کے ساتھ ابھی تحریک شروع کرنے سے متعلق کوئی بات نہیں ہوئی۔