ادارے بند گلی میں جاچکے، بات چیت ہی ملکی مسائل کا واحد حل ہے، عارف علوی

سابق صدر مملکت و سینیئر رہنما پاکستان تحریک انصاف (پی ٹی آئی) عارف علوی نے کہا ہے کہ ملکی مسائل کا حل مذاکرات میں ہی ہے، میں اس کے لیے کوشش کرتا رہوں گا۔

لاہور میں میڈیا سے گفتگو کرتے ہوئے عارف علوی نے کہاکہ عمران خان سے جیل میں ملاقات ہوئی، وہ اچھے موڈ میں ہیں اور صحت بھی ٹھیک ہے۔

انہوں نے کہاکہ عمران خان کی پارٹی کو عوام نے الیکشن میں بھرپور مینڈیٹ دیا اس کے باوجود وہ قید میں ہیں، موجودہ پارلیمنٹ فارم 47 والی ہے، اگر یہی چلتی رہی تو حالات ٹھیک نہیں ہوسکیں گے۔

عارف علوی نے کہاکہ میڈیا کی وجہ سے پتا چل رہا ہے کہ دنیا میں کیا ہورہا ہے، غزہ میں ہونے والے مظالم سوشل میڈیا کے ذریعے سامنے آئے مگر پاکستان میں سوشل میڈیا کو بھی بند کردیا گیا۔

انہوں نے کہاکہ پاکستانی معیشت کو سنبھالا دینے کے لیے اس وقت سرمایہ کاری کی ضرورت ہے، سعودی عرب سے آنے والے وفد کا ملک کو فائدہ ہوگا۔

سابق صدر مملکت نے کہاکہ میں نے فوج کا ہمیشہ دفاع کیا مگر ہمارے تمام ادارے ایک بند گلی میں چلے گئے ہیں، 6 ججوں نے جو خط لکھا ہے اس کا کیس سپریم کورٹ میں ہے۔

انہوں نے کہاکہ پنجاب پولیس نے ہر کسی کے گھر میں جاکر توڑ پھوڑ کی اور چادر و چاردیواری کا تقدس پامال کیا۔

واضح رہے کہ سابق صدر عارف علوی نے جمعرات 9 مئی کو اڈیالہ جیل میں عمران خان سے ملاقات کی تھی۔

گزشتہ روز میڈیا سے گفتگو کرتے ہوئے عارف علوی نے کہا تھا کہ عمران خان جیل میں رہ لے گا مگر ڈیل نہیں کرے گا۔