سرگودھا کے علاقے فاضل ٹاؤن میں گیس سلنڈر پھٹنے سے دھماکا ہوا جس کے نتیجے میں 2 افراد جاں بحق جبکہ 2 زخمی ہوگئے ہیں۔ مرنے والوں میں ایک مرد اور ایک خاتون شامل ہے۔
سرگودھا پولیس کے مطابق سلنڈر پھٹنے کا واقعہ سرگودھا کے نواحی علاقے فاضل ٹاؤن میں پیش آیا جہاں گھر میں موجود گیس سلنڈر اچانک زور دار دھماکے سے پھٹ گیا، جس کے باعث گھر زمین بوس ہو گیا، ملبے تلے دب کر 2 افراد موقع پر ہی دم توڑ گئے جبکہ 2 زخمی ہوئے ہیں۔
مزید پڑھیں
جاں بحق افراد کی لاشوں اور زخمیوں کو ڈی ایچ کیو ٹیچنگ اسپتال سرگودھا منتقل کر دیا گیا ہے، زخمیوں کی حالت بھی تشوشناک بتائی جا رہی ہے۔
پولیس حکام کے مطابق جائے وقوعہ سے شواہد اکٹھے کیے جا رہے ہیں، دھماکے سے متعلق مزید تحقیقات جاری ہیں۔
ریسکیو 1122 کے مطابق واقعے کی اطلاع ملتے ہی ٹیمیں موقع پر پہنچ گئیں اور ملبے سے لاشوں اور زخمیوں کو نکال کر اسپتال منتقل کیا گیا۔
امدادی ٹیموں نے زخمیوں کو بروقت اسپتال منتقل کیا، جہاں ان کو طبی امداد دی جا رہی ہے، تاہم زخمیوں کی حالت تشویشناک بتائی جارہی ہے۔