اقتدار ان کا حق ہے جن کو عوام نے منتخب کیا، تحفظ آئین تحریک

حکومت مخالف اتحاد تحفظ آئین تحریک کے رہنماؤں نے کہا ہے کہ بانی چیئرمین تحریک انصاف عمران خان کے خلاف 190 ملین کیس میں کچھ ثابت نہیں ہوا، عنقریب ان کے خلاف سائفر کیس بھی ختم ہوجائے گا۔

تحفظ آئین تحریک کے رہنماؤں محمود خان اچکزئی، حامد رضا، لطیف کھوسہ، اسد قیصر اور علامہ ناصر عباس نے فیصل آباد میں پریس کانفرنس کرتے ہوئے کہا کہ نواز شریف سمیت سب سیاسی جماعتوں کے سربراہان کو کہتے ہیں کہ وہ اقتدار چھوڑ دیں، کیوں کہ 8 فروری کے الیکشن میں پی ٹی آئی جیتی۔

انہوں نے کہا کہ فارم 47 کے تحت بیٹھے لوگ ناجائز تنخواہ لے رہے ہیں، وہ اقتدار چھوڑ دیں، اقتدار ان کا حق ہے جن کو عوام نے منتخب کیا۔

انہوں نے کہا کہ 190 ملین پاؤنڈ کیس میں کوئی جرم ثابت نہیں ہوا، عنقریب بانی پی ٹی آئی عمران خان کے خلاف سائفر کیس ختم ہوجائے گا۔

اس موقع پر تحفظ آئین تحریک کے رہنماؤں نے شکوہ کیا کہ ان کو 17 مئی کو جلسہ کرنے کی اجازت نہیں ملی، لاہور ہائیکورٹ میں درخواست دی ہے،اجازت لینے کے بعد جلسہ کریں گے۔