وزیراعلیٰ پنجاب کی رہائش گاہ کی سیکیورٹی کے نام پر کروڑوں کے اخراجات کی مبینہ کوششوں کے پس منظر میں تحریک انصاف نے پنجاب کی صوبائی حکومت سے اس ضمن میں اخراجات کی تفصیلات فراہم کرنے کا مطالبہ کیا ہے۔
مزید پڑھیں
ترجمان تحریک انصاف نے ایک بیان میں کہا ہے کہ پنجاب کے عوام مہنگائی، بے روزگاری اور وسائل کی شدید قلّت کے بوجھ تلے سسک رہے ہیں، پہلے 36.4 کروڑ روپے جاتی امرا کی سیکیورٹی پر اڑائے گئے جبکہ موجودہ صوبائی حکومت 14.9 کروڑ روپے اڑانے کی تیاریوں میں ہے۔
ترجمان کے مطابق پنجاب کی نوکر شاہی میں حکومتی خاندان کے حامی خزانے کو فارم 47 زدہ ٹک ٹاکر کے نخروں پر اڑا رہی ہے، اس سے قبل اسی خاندان کے 2 وزراء اعلیٰ صوبائی خزانے کو خاندانی میراث سمجھ کر اڑاتے رہے۔
’عمران خان وزیراعظم تھے تو اپنی ذاتی رہائشگاہ میں مقیم رہے اور بنی گالہ کی سیکیورٹی کے تمام اخراجات انہوں نے اپنی جیب سے ادا کیے، پنجاب کی نوکر شاہی شرم و حیا کا مظاہرہ کرے اور عوام کا پیسہ مینڈیٹ چور کی مرضی سے برباد کرنے سے باز آئے۔‘
ترجمان تحریک انصاف کا کہنا تھا کہ ان کی جماعت یہ معاملہ ایوان میں اٹھائے گی اور خزانے کی بربادی کو کسی صورت قبول نہیں کرے گی۔
