جاپان کے ایک ڈپارٹمنٹل اسٹور سے 10 ملین ین (قریباً ایک کروڑ 78 لاکھ) سے زیادہ مالیت کا سونے کا بنا ایک کپ چوری ہوگیا ہے، جسے ایک ایسے ڈسپلے باکس میں نمائش کے لیے رکھا گیا تھا جس پر تالا نہیں لگا تھا۔
خالص 24 قیراط سونے سے بنا یہ چائے کا کپ ٹوکیو کی ایک بڑی چین، تاکاشیمایا کے ایک اسٹور سے غائب ہوا جہاں سونے کی بنی چیزوں کو فروخت کرنے کے لیے ان کی نمائش کی جارہی تھی۔
تاکاشیمایا کے ترجمان نے اے ایف پی کو بتایا کہ یہ کپ، چمکیلے چائے کے اور کھانے پینے کے برتنوں اور صارفین کے لیے ڈسپلے میں رکھی گئی ایک ہزار نادر اشیا میں مہنگا ترین تھا۔ اسے تالے کے بغیر ایک شفاف باکس میں رکھا گیا تھا، تاکہ صارفین اسے قریب سے دیکھنے کے لیے آسانی سے باہر نکال سکیں۔
مزید پڑھیں
مقامی میڈیا نے رپورٹ دی ہے کہ کہ سیکیورٹی فوٹیج میں ایک شخص کو اپنے بیگ میں کپ رکھتے اور موقع سے فرار ہوتے ہوئے دکھایا گیا ہے، اور پولیس اس شخص کو تلاش کر رہی ہے۔ ترجمان نے کہا کہ نمائش جاری رہے گی لیکن تاکاشیمایا اپنی سیکیورٹی کو سخت کردے گا۔
سونے کی اشیا کی چوری کوئی نہیں بات نہیں۔ 2019 میں برطانیہ کے بلینہم پیلس میں ہونے والی ایک نمائش سے خالص سونے کا بنا ہوا ایک انوکھا کموڈ چوری ہو گیا تھا جس کی قیمت 12 لاکھ 50 ہزار ڈالرز بتائی گئی تھی۔ بلینہم پیلس لندن کے مغربی علاقے میں واقع ہے۔ اسی محل میں برطانیہ کے سابق وزیرِ اعظم ونسٹن چرچل بھی پیدا ہوئے تھے۔
سونے کا کموڈ اٹلی کے ایک فن کار ماؤریزیو کیٹیلن نے بنایا تھا اور اسے چوری سے صرف 2 روز قبل ہی بلینہم پیلس میں نصب کیا گیا تھا۔ پولیس کا کہنا ہے کہ کموڈ چوری کرنے والے لوگ 2 گاڑیوں میں آئے تھے جب کہ کموڈ پیلس کے نکاسی نظام سے جڑا ہوا تھا۔ پولیس کے مطابق کموڈ نکال کر لے جانے سے محل میں پانی بھر گیا۔ جس سے اس تاریخی ورثے کو بھی نقصان پہنچا۔
