کامیڈین و شاعر منور فاروقی نے اپنے قریبی عزیز و اقارب کی موجودگی میں ایک نجی تقریب میں دوسری شادی رچا لی۔
بھارتی ریئیلیٹی شو ‘بگ باس’ کے 17ویں سیزن کے فاتح منور فاروقی 2023 کے آخر سے ایک سے زیادہ لڑکیوں کے ساتھ تعلقات میں رہنے کے سبب شہ سرخیوں کا حصہ بنے رہے۔ منور فاروقی کے مداح اس حوالے سے متجسس رہے کہ ان کی نئی گرل فرینڈ کون ہے لیکن اسٹینڈ اپ کامیڈین نے گرل فرینڈ کی شناخت منظرِ عام پر آنے سے قبل ہی اس سے شادی کرلی ہے۔
مزید پڑھیں
بھارتی میڈیا ’ٹائمز ناؤ‘ کی رپورٹ کے مطابق منور فاروقی نے دو ہفتے قبل چند قریبی دوستوں اور رشتے داروں کی موجودگی میں دوسری شادی کرلی ہے۔ دوسری شادی کی خبر پہلے ایک انسٹاگرام فین پیج نے جاری کی تھی جس کی تصدیق نہیں ہوسکی تھی لیکن ٹائمز ناؤ نے اس خبر کی تصدیق منور فاروقی کے قریبی ذرائع سے کی۔
ذرائع نے ٹائمز ناؤ کو بتایا کہ ’ ہاں منور نے شادی کرلی ہے لیکن وہ یہ بات خفیہ رکھنا چاہتا تھا اسی لیے آپ کو شادی کی کوئی خاص تصاویر بھی نہیں ملیں گی‘۔
فین پیج کے مطابق منور فاروقی نے ممبئی کے لگژری ہوٹل آئی ٹی سی مراٹھا میں 26 مئی 2024 کو مختصر سی تقریب میں نکاح کیا۔ منور فاروقی نے ’مہ جبین کوٹ والا‘ نامی لڑکی سے شادی کی ہے جو ممکنہ طور پر ایک میک اپ آرٹسٹ ہیں۔
یہاں یہ بات قابلِ ذکر ہے کہ فین پیج اور ٹائمز ناؤ کی رپورٹ میں نکاح کی تاریخ کا تضاد ہے، ٹائمز ناؤ کے مطابق شادی دو ہفتے پہلے ہوئی جبکہ فین پیجز کا دعویٰ ہے کہ منور کی شادی گزشتہ روز یعنی 26 مئی کو ہوئی ہے۔
خیال رہے کہ سال 2017 میں منور فاروقی نے پہلی شادی کی تھی جس سے ان کا ایک بیٹا پیدا ہوا اور سال 2020 میں نامعلوم وجوہات کی وجہ سے اپنی پہلی بیوی سے علیحدہ ہوگئے جبکہ بیٹا ان کی اہلیہ کے پاس ہے۔
