قومی ٹیم کے سابق فاسٹ بولر شعیب اختر 3 سال بعد اپنی ناراضی ختم کرکے ایک بار پھر پاکستان ٹیلی وژن (پی ٹی وی) کا حصہ بن گئے۔ نئے معاہدے کے تحت وہ پی ٹی وی اسپورٹس کے لیے بطور مبصر فرائض انجام دیں گے۔
مزید پڑھیں
راولپنڈی ایکسپریس شعیب اختر کی دنیا بھر میں فین فالوونگ ہے اور وہ کرکٹ کے بین الاقوامی مقابلوں میں کمنٹیٹر کے فرائض سرانجام دینے کے علاوہ مختلف ٹی وی چینلز پر تجزیہ کار کی حیثیت سے بھی نظر آتے ہیں۔
شعیب اختر کی واپسی میں وفاقی وزیر اطلاعات و نشریات عطا تارڑ کا خاصا کردار رہا ہے اور انہوں نے اس حوالے سے ذاتی طور بھی کافی کوششیں کی ہیں جو بالآخر رنگ لے آئیں۔
Welcome home #RawalpindiExpress #ShoaibAkhtar to the PTV family. Warm reception by Fed Min Info Ataullah Tarar & PTV mgmt to the legend. #GameOnHai@shoaib100mph@TararAttaullah pic.twitter.com/J0cq5DRuXS
— PTV Sports (@PTVSp0rts) May 31, 2024
عطا تارڑ اور مبشر توقیر نے شعیب اختر کا پی ٹی وی ہیڈکوارٹرز میں استقبال کیا
جمعے کو شعیب اختر پی ٹی وی ہیڈ کوارٹرز اسلام آباد پہنچے جہاں وزیر اطلاعات عطا تارڑاور ایم ڈی پی ٹی وی مبشر توقیر نے ان کا استقبال کیا۔
جون 2024 سے امریکا اور ویسٹ انڈیز میں شروع ہونے والے ٹی 20 کرکٹ ورلڈ کپ میچز پی ٹی وی اسپورٹس پر براہ راست نشر کیے جائیں گے۔ ان مقابلوں کی نشریات میں شعیب اختر بطور تجزیہ کار اپنی ماہرانہ رائے دیں گے۔
واضح رہے کہ اکتوبر 2021 میں کرکٹ کے مقابلوں کے براہ راست شریات کے دوران ایک ناخوشگوار واقعے کے بعد وہ پی ٹی وی سے علیحدہ ہوگئے تھے۔
پی ٹی وی ہیڈکوارٹر میں ملاقات کے دوران ان کی عطا تارڑ و دیگر سے پی ٹی وی اسپورٹس کو مزید بہتر بنانے اور ٹی 20 ورلڈ کپ کے لیے تیاریوں سے متعلق گفتگو ہوئی۔
