جماعت اسلامی پاکستان کے امیر حافظ نعیم الرحمان نے کہا ہے کہ پوری دنیا غزہ میں جنگ بندی کی بات کررہی ہے مگر امریکا اسرائیل کو اربوں روپے کی فنڈنگ کررہا ہے۔ سوال یہ ہے کہ پیپلزپارٹی اور مسلم لیگ ن والے اسرائیل کے خلاف تحریک کیوں نہیں چلاتے۔
کراچی میں غزہ مارچ سے خطاب کرتے ہوئے حافظ نعیم الرحمان نے کہاکہ امریکا انسانیت کا دشمن بنا ہوا ہے، اس وقت 40 ہزار کے قریب فلسطینی اسرائیل کی بمباری میں شہید ہوچکے ہیں۔ حماس نے اسرائیل کی ٹیکنالوجی کو ناکام بناکر ان کا غرور خاک میں ملا دیا ہے۔
مزید پڑھیں
انہوں نے کہاکہ اسرائیل پناہ گزینوں کے کیمپوں پر بھی حملے کررہا ہے، دشمن ملک نے شکست دیکھ کر عورتوں اور بچوں کو بھی شہید کرنا شروع کردیا ہے۔
حافظ نعیم الرحمان نے کہاکہ غزہ میں مظالم کے خلاف پوری دنیا کے ممالک میں ملین مارچ ہورہے ہیں، ہمیں اس وقت اتحاد کی ضرورت ہے۔
انہوں نے کہاکہ اسرائیل نے حماس کے خلاف کارروائی کی تو اسے منہ کی کھانا پڑی، اس کے ٹینک تباہ ہوئے اور ہزیمت کا سامنا کرنا پڑا۔
امیر جماعت اسلامی نے کہاکہ اسرائیل کو پیغام ہے کہ شہری آبادی کو نشانہ بنایا تو تل ابیب نشانے پر ہوگا، لوگ آج وائٹ ہاؤس کے سامنے احتجاج کررہے ہیں۔
انہوں نے کہاکہ ہم حماس کے نوجوانوں کو خراج تحسین پیش کرتے ہیں جو اسرائیل کے خلاف لڑرہے ہیں، آج کراچی والوں نے بھی ثابت کردیا ہے کہ وہ فلسطینی بھائیوں کے ساتھ ہیں۔
