گزشتہ دنوں ڈھاکا میں کھیلے گئے ون ڈے میچ میں پاکستان کے بلے باز سلمان علی آغا کے رن آؤٹ تنازع کے بعد ایم سی سی کی وضاحت سامنے آگئی ہے۔
میریلبون کرکٹ کلب (ایم سی سی) نے واضح کیا ہے کہ قوانین کے مطابق سلمان علی آغا رن آؤٹ ہی تھے۔ ڈھاکا ون ڈے میں سلمان کریز سے باہر تھے، جبکہ گیند کریز پر موجود تھی۔ اس کے علاوہ، بیٹر کو فیلڈنگ سائیڈ کی اجازت کے بغیر گیند اٹھانے کی اجازت نہیں ہوتی۔
ایم سی سی نے کہا کہ کھلاڑیوں کے ٹکرانے سے گیند خود بخود ڈیڈ نہیں ہوتی، تاہم اسپرٹ آف کرکٹ کے تحت بنگلہ دیش اپیل واپس لے سکتی تھی۔
یہ بھی پڑھیے: بنگلہ دیش کے خلاف آؤٹ پر ردعمل، آئی سی سی کی سلمان علی آغا کے خلاف کارروائی
ایم سی سی نے مزید کہا کہ امپائرز کا فیصلہ بھی مکمل طور پر قوانین کے مطابق تھا اور اس معاملے میں کوئی متبادل راستہ نہیں تھا۔
واضح رہے کہ بنگلہ دیش کے کپتان مہدی حسن میراز نے سلمان کو نان اسٹرائیکر اینڈ پر رن آؤٹ کیا تھا، جس پر آغا نے میدان چھوڑتے ہوئے شدید غصے کا اظہار کیا تھا۔
اس کے بعد آئی سی سی نے سلمان علی آغا کے خلاف کارروائی کرتے ہوئے انہیں ایک ڈی میرٹ پوائنٹ دے دیا۔ آئی سی سی کے مطابق سلمان کو کوڈ آف کنڈکٹ کے لیول ون کی خلاف ورزی کے مرتکب پایا گیا۔
