میڈیا کی مشہور شخصیت روپرٹ مرڈوک نے کیلیفورنیا میں ایک تقریب کے دوران روسی نژاد ریٹائرڈ مالیکیولر بائیولوجسٹ 67 سالہ ایلینا ژوکووا سے پانچویں شادی کرلی۔
مرڈوک کے اخبار ’دی سن ٹیبلائیڈ‘ نے دولہا کی سیاہ سوٹ اور پیلے رنگ کی ٹائی پہنے ہوئے تصاویر شائع کیں جبکہ دلہن نے سفید رنگ کا گاؤن پہنا ہوا ہے۔ تقریب کے مہمانوں میں نیو انگلینڈ پیٹریاٹس یو ایس فٹ بال ٹیم کے مالک رابرٹ کرافٹ اور نیوز کارپوریشن کے چیف ایگزیکٹو رابرٹ تھامسن شامل تھے۔
مزید پڑھیں
ماڈل اور اداکار جیری ہال سے مرڈوک کی چوتھی شادی 2022 میں طلاق پر ختم ہوئی تھی۔ ارب پتی نے اس سے قبل چینی نژاد ٹیلی ویژن ایگزیکٹو وینڈی ڈینگ، اسکاٹش نژاد آسٹریلوی صحافی اینا ٹورو اور آسٹریلوی فلائٹ اٹینڈنٹ پیٹریشیا بکر سے شادی کی تھی۔
مرڈوک کے 6 بچے ہیں، انہوں نے گزشتہ سال ڈینٹل ہائیجینسٹ سے قدامت پسند ریڈیو میزبان بننے والی این لیسلے اسمتھ سے منگنی کا اعلان کیا تھا۔ جبکہ زوکووا نے اس سے قبل ارب پتی توانائی سرمایہ کار اور روسی سیاست دان الیگزینڈر ژوکوف سے شادی کی تھی۔
1950 کی دہائی میں ایڈیلیڈ سے شائع ہونے والے اخبار دی نیوز کے وارث بننے کے بعد عالمی میڈیا سلطنت قائم کرنے والے مرڈوک نے نومبر میں فاکس نیوز کی پیرنٹ کمپنی اور ان کی نیوز کارپوریشن میڈیا ہولڈنگز دونوں کے سربراہ کے عہدے سے استعفیٰ دے دیا تھا۔
مرڈوک کے اچانک استعفے کے بعد میڈیا کا کنٹرول ان کے بیٹے لچلن کو سونپ دیا گیا جس میں فاکس نیوز، ٹائمز آف لندن اور وال اسٹریٹ جرنل شامل ہیں۔
