امریکا اور ویسٹ اینڈیز میں جاری آئی سی سی ٹی20 ورلڈ کپ2024 کے دوران نمیبیا اور عمان کا میچ برابر ہوا، سپر اوور میں نمیبیا نے عمان کو شکست دے دی۔ نمیبیا نے سپر اوور میں 22 رنز کا ہدف دیا جبکہ عمان کی ٹیم صرف 10 رنز بنا سکی۔
برج ٹاؤن کے کینسنگٹن اوول میں نمیبیا نے عمان کے خلاف ٹاس جیت کر فیلڈنگ کا فیصلہ کیا تاہم عمان نے پہلے بیٹنگ کرتے ہوئے نمیبیا کو 110 رنز کا ہدف دیا، جبکہ ہدف کے تعاقب میں نمیبیا مقررہ اوورز 109 رنز بنا سکی اور میچ برابر ہوگیا۔
مزید پڑھیں
نمیبیا کے اوپنر مائیکل وان لنجین بغیر کوئی رن بنائے آؤٹ ہوئے، نکولاس ڈیون 24، جان فرائیلنک نے 45 رنز بنائے اور آؤٹ ہوگئے، کپتان گرہارڈ ایراسمس 13 رنز بنا سکے، بیٹر جے جے اسمٹ نے 8 جبکہ زین گرین 0 پر آؤٹ ہوئے۔ ڈیوڈ ویزے 9 اور ملان کروگر 1 رن بنا کر آخر تک وکٹ پر موجود رہے۔
عمان کی جانب سے پیسر بلال خان نے 1، کپتان عاقب الیاس نے 1، مہران خان نے 3 اور ایان خان نے 1 وکٹ حاصل کی۔
اس سے قبل عمان کی پوری ٹیم 19.4 اوورز میں 109 رنز بنا سکی اور آؤٹ ہوگئی، میچ کے پہلے ہی اوور میں عمان کی بیٹنگ لائن للکھڑا گئی، اور 2 وکٹیں گنوا دیں۔ اوپنر کیشیپ پراجاپتی اور عاقب الیاس بغیر کوئی رن بنائے پویلین لوٹ گئے۔
بیٹر نسیم خوشی 6، ذیشان مقصود 20، ایان خان 15، محمد ندیم 6، مہران خان 7، شکیل احمد 11 اور کلیم اللہ صرف 2 رنز بنا سکے جبکہ بلال خان نے 1 رن بنایا۔
نمیبیا کی جانب سے پیسر روبین ٹرمپیلمین نے بہترین بولنگ کرتے ہوئے 4 کھلاڑیوں کو آؤٹ کیا، ڈیوڈ ویزے نے 3 بلے بازوں کو پویلین کی راہ دکھائی، برنارڈ اسکولٹز نے 1 جبکہ کپتان گرہارڈ ایراسمس نے 2 وکٹیں اپنے نام کیں۔
دونوں ٹیموں کا اسکواڈ
عمان کے اسکواڈ میں کپتان عاقب الیاس، کیشیپ پراجاپتی، نسیم خوشی، ذیشان مقصود، خالد کیل، ایان خان، محمد ندیم، مہران خان، شکیل احمد، کلیم اللہ اور بلال خان شامل ہیں۔
نمیبیا کے اسکواڈ میں کپتان گرہارڈ ایراسمس، نکولاس ڈیون، مائیکل وان لنجین، جان فرائیلنک، ملان کروگر، جے جے اسمٹ، ڈیوڈ ویزے، زین گرین، روبین ٹرمپلمین، برنارڈ اسکولٹز اور ٹینجینی لونگامینی شامل ہیں۔
