دنیا میں ایسے افراد کی کمی نہیں ہے جو دوسروں کی نسبت زیادہ غصیلہ اور جارحانہ رویہ رکھتے ہیں تاہم ایک عام سا سپلیمینٹ اس رویے کو کم کرنے میں معاون ثابت ہو سکتا ہے۔
مزید پڑھیں
پنسلوینیا یونیورسٹی کی ایک نئی تحقیق کے مطابق اومیگا تھری سپلیمینٹ لینے سے آپ کا جارحانہ رویہ کم ہو سکتا ہے۔ اومیگا 3 سپلیمینٹس عام طور پر مچھلی کے تیل کی گولیوں کی شکل میں آتے ہیں۔جریدے ایگریشن اینڈ وائلنٹ ہیویئر میں شائع ہونے والی اس تحقیق کے مطابق 3918 شرکا میں اومیگا 3 سپلیمینٹ لینے سے جارحانہ رویے میں اوسطاً 22 فیصد کمی واقع ہوئی۔
اس تحقیق کے اہم مصنف ایڈریئن رائن کا کہنا ہے کہ میرے خیال میں وقت آ گیا ہے کہ جارحانہ رویے کو کم کرنے کے لیے اومیگا 3 کے سپلیمینٹ کو استعمال کیا جائے۔ اومیگا 3 کوئی جادوئی گولی نہیں ہے جو معاشرے میں تشدد کے مسئلے کو مکمل طور پر حل کر دے گی، تاہم اس تحقیق کے نتائج کی بنیاد پر، ہمیں پختہ یقین ہے کہ ایسا ہو سکتا ہے اور اس نئی تحقیق کے بعد اس پر عمل کرنا شروع کر دینا چاہیے۔
اس تحقیق میں تمام شرکا کو اومیگا تھری کے سپلیمینٹس دیے گئے تاہم اس کے بعد غصہ دلانے والے حالات کا سامنے کرنے پر بھی ان میں جارحانہ رویہ نہیں دیکھا گیا۔مصنفین کا کہنا ہے کہ اومیگا تھری سپلیمینٹس کا اثر قلیل مدتی ہے یا یہ طویل مدت تک بھی کار آمد ثابت ہوسکتا ہے اس کے لیے ابھی مزید تحقیق کی ضرورت ہے۔
خیال رہے کہ مچھلی کے تیل کے سپلیمینٹس صحت کے کئی فوائد پیش کرتے ہیں جن میں دماغ اور دل کی صحت قابل ذکر ہے، حالانکہ ایک حالیہ تحقیق کے مطابق مچھلی کا تیل پہلی بار دل کی بیماری یا فالج کا خطرہ بڑھا سکتا ہے۔
