وزیراعظم پاکستان شہبازشریف نے لاہور اور قصورمیں مفت آٹے کی تقسیم کے مختلف مقامات کا اچانک دورہ کیا اور لوگوں کی مشکلات معلوم کیں۔
وزیراعظم نے آٹے کے معیار اور اس کے حصول کے لیے مشکلات سے متعلق شہریوں کی رائے جاننے کے علاوہ لوگوں کے لیے قائم انتظار گاہ کا بھی دور ہ کیا۔
شہبازشریف اس موقع پر لوگوں میں گھل مل گئے اور مفت آٹا خود تقسیم کرنے کے ساتھ ساتھ بچوں سے بھی گپ شپ بھی کی۔
وزیراعظم نے شہریوں کی آرا کی روشنی میں متعلقہ حکام کو اقدامات کرنے کی ہدایت کی اور کہا کہ رمضان المبارک میں کسی شہری کو کوئی تکلیف نہیں ہونی چاہیے،مفت آٹا فراہمی کے سنٹرز میں بزرگوں سمیت معذور اور کمزور افراد کا خاص خیال رکھا جائے۔
وزیراعظم نے بزرگ خواتین اوربچوں کے ساتھ آنے والی خواتین کے لیے بھی بہترین انتظامات کرنے کی ہدایت کرتے ہوئے کہا کہ اس کار خیر کو سرکاری نہیں بلکہ خدائی ڈیوٹی سمجھ کر انجام دیا جائے، رمضان المبارک میں مخلوق خدا کی خدمت کرکے اللہ تعالیٰ کو راضی کریں۔
وزیراعظم شہبازشریف نے مفت آٹا فراہمی کے سنٹرز پر بہترین انتظامات پر سیکرٹری خوراک پنجاب ،چیف سیکرٹری پنجاب ،ڈپٹی کمشنرز کو شاباش دی اور کارکردگی کی تعریف کی ۔
