بھارتی انتخابات میں کانگریس کا صفایا ہوگیا، ہم تیسری بار حکومت بنانے جارہے ہیں، نریندر مودی

بھارتی وزیراعظم نریندر مودی نے کہا ہے کہ بھارت کے عوام نے مجھے نیا اعتماد دیا ہے اور ہم تیسری بار حکومت بنانے جارہے ہیں۔

نئی دلی میں بی جے پی ہیڈکوارٹرز پر کارکنوں سے خطاب کرتے ہوئے نریندرا مودی نے کہاکہ عام انتخابات میں کانگریس کا صفایا ہوگیا، ایسا لگتا ہے کہ ان کے لیے ضمانت بچانا بھی مشکل ہوگیا ہے۔

انہوں نے کہاکہ انتخابات کے نتائج ایک ارب 40 کروڑ بھارتیوں کی جیت ہے، اس سے دنیا کی سب سے بڑی جمہوریت کی جیت ہوئی۔

واضح رہے کہ بھارت میں ہونے والے انتخابات کے نتائج آنے کا سلسلہ جاری ہے، جس کے مطابق بی جے پی کی سربراہی میں بننے والے اتحاد این ڈی اے کو اب تک تقریباً 300 نشستوں پر برتری حاصل ہے۔

دوسری جانب کانگریس کی سربراہی میں 24 جماعتی اتحاد کو 231 نشستوں پر برتری حاصل ہے۔

اس سے قبل کانگریس کے رہنما راہول گاندھی نے پریس کانفرنس کرتے ہوئے کہا تھا کہ ہم نے صرف بی جے پی کے خلاف نہیں ریاستی مشینری کے خلاف الیکشن لڑا، خفیہ ایجنسیاں، بیوروکریسی اور آدھی عدلیہ ہمارے خلاف تھی۔

انہوں نے کہاکہ بی جے پی نے پارٹیاں توڑیں اور وزرائے اعلیٰ کو جیلوں میں ڈالا لیکن بھارت کے عوام نے متفقہ فیصلہ سنا دیا ہے کہ ہمیں مودی جی نہیں چاہییں۔

راہول گاندھی نے کہاکہ کانگریس رہنماؤں نے متحد ہو کر انتخاب لڑا اور ہماری لڑائی آئین کو بچانے کی تھی۔

انہوں نے کہاکہ ہم اپنے ساتھیوں سے مشاورت کے بعد کسی بھی جماعت سے اتحاد کے بارے میں فیصلہ کریں گے۔

انہوں نے کہاکہ ہم نے عوام کے ساتھ جو وعدے کیے تھے وہ پورے کریں گے، آئندہ کے لائحہ عمل کے حوالے سے فیصلہ اتحادیوں سے مشاورت کے بعد ہوگا۔

ایک سوال کے جواب میں راہول گاندھی نے کہاکہ کون سی سیٹ رکھنی اور کون سی چھوڑنی ہے اس حوالے سے ابھی فیصلہ نہیں کیا۔