کراچی میں صنعتکار آصف بلوانی کے قتل پر شہر قائد کے صنعتکاروں نے سخت ردعمل دیا ہے۔
فیڈرل بی ایریا ایسوسی ایشن آف ٹریڈ انڈسٹری نے چیف آف آرمی اسٹاف اور کور کمانڈر کراچی کو خط لکھنے کا فیصلہ کرلیا۔
آصف بلوانی کے قتل پرکراچی کے ساتوں صنعتی زونز کے نمائندوں نے مشترکہ پریس کانفرنس کرتے ہوئے کہاکہ پولیس آصف بلوانی کے قتل کو ٹارگٹ کلنگ کا رنگ دینے کی کوشش کررہی ہے۔
مزید پڑھیں
تنظیم کے عہدیدار رضا حسن نے کہاکہ واقعہ لوٹ مار کا ہے جس میں آصف بلوانی جان کی بازی ہار گئے، قاتل گرفتار نہ ہوئے توسخت لائحہ عمل کے طور پر ہڑتال سمیت احتجاج اور دیگرآپشنز پر غور کریں گے۔
دوسری جانب کراچی چیمبر نے بھی وزیراعظم اور آرمی چیف سے کراچی میں بڑھتی ہوئی ٹارگٹ کلنگ کا نوٹس لینے کی اپیل کی ہے۔
صدر کراچی چیمبر افتخار شیخ نے کہاکہ کراچی کا امن بحال نہ ہوا تو سرمایہ کاری منتقل ہونا شروع ہوجائے گی۔
انہوں نے کہاکہ امن و امان کی صورتحال پر وزیراعلیٰ قانون نافذ کرنے والے اداروں اور تاجر برادری کی میٹنگ بلائیں۔
افتخار شیخ نے کہاکہ کراچی میں ٹارگٹ کلنگ کے بڑھتے ہوئے واقعات پر شدید تحفظات ہیں، وزیر داخلہ اس لاقانونیت کا نوٹس لیں۔
انہوں نے کہاکہ اگر فوری طور پر توجہ نہ دی گئی تو ملک کے سب سے بڑے شہر سے سرمایہ کاری منتقل ہونا شروع ہو جائے گی اور پہلے سے ہی بیمار معیشت کے لیے مسائل مزید بڑھ جائیں گے۔
