حکومت کی بیوقوفی سے حمود الرحمان کمیشن کو دوبارہ شہرت ملی، شیخ رشید

سابق وزیرداخلہ شیخ رشید نے جیلوں میں قید پی ٹی آئی خواتین صنم جاوید، عالیہ حمزہ، ڈاکٹر یاسمین راشد کو رہا کرنے اور لوگوں کو عیدالاضحی پر عام معافی دینے کی اپیل کردی ہے۔

اسلام آباد میں عدالت میں پیشی کے موقع پر میڈیا سے گفتگو کرتے ہوئے عوامی مسلم لیگ کے سربراہ شیخ رشید احمد نے کہا ’ عدالتیں چھوٹی پڑگئی ہیں بے گناہ لوگوں کی تعداد زیادہ ہے، اڈیالہ میں غریب لوگ ہیں اس گرمی میں 500 لوگوں کی پیشی ہوتی ہے۔‘

سابق وزیرداخلہ نے صنم جاوید ،عالیہ حمزہ اور ڈاکٹر یاسمین راشد کی رہائی کی اپیل کرتے ہوئے کہا کہ فوج کی عزت ہمیں جان سے زیادہ عزیز ہے لیکن گرفتاریوں سے کیا پیغام جارہا ہے؟ میری درخواست ہے اس عید پر عام معافی دی جائے۔

انہوں نے کہا کہ اگلے 45 دن اہم ہیں، لوگ تنگ ہیں، ملک میں اب سیاسی فیصلے ہوں گے، سرمایہ کار ملک سے باہر جارہے ہیں تو بیرون ملک سے سرمایہ کار کیسے آئیں گے۔

شیخ رشید نے کہا کہ ملک تباہی کے کنارے کھڑا ہے، حالات اتنے خراب ہوگئےہیں کہ راولپنڈی میں جنازے لوٹے جارہے ہیں، ملک کو تباہی سے بچایا جائے۔

اسلام آباد :سابق وفاقی وزیر داخلہ شیخ رشید احمد کی ڈسٹرکٹ کورٹ کے باہر میڈیا سے گفتگو pic.twitter.com/r14lvIhatp

— Sheikh Rashid Ahmed (@ShkhRasheed) June 6, 2024

حمود الرحمان کمیشن کی رپورٹ کے بارے میں صحافی کی جانب سے پوچھے گئے سوال کے جواب میں سابق وفاقی وزیر نے کہا کہ حمود الرحمان کمیشن کی رپورٹ عام لوگوں کے پاس بھی ہے، ایک حقیقت ہے کہ 1971 میں ملک دو ٹکڑے ہوا، اب حمود الرحمان کمیشن کو حکومت کی بیوقوفی کی وجہ سے دوبارہ شہرت اور زندگی ملی ہے، ورنہ لوگ اس کو بھول چکے تھے۔

’یہ نالائق لوگ ہیں انہوں نے جو کام بھی کیا ہے وہ عمران خان کے فائدے میں گیا ہے اور ان کے نقصان میں گیا ہے۔‘