سربراہ عوامی مسلم لیگ شیخ رشید کا کہنا ہے کہ وہ مقدمات کا سامنا کرتے ہوئے تھک گئے ہیں، بہتر ہے اب سزائیں دے کر جان چھوڑیں۔
انسدادِ دہشت گردی راولپنڈی کی عدالت میں پیشی کے بعد میڈیا سے گفتگو میں شیخ رشید کا کہنا تھا کہ وہ یہاں موجود ہی نہیں تھے لیکن انہیں مقدمات میں ملوث کیا جارہا ہے۔
’حالت ان کی یہ ہے کہ ہمارے گھروں پر چھاپے مارے جا رہے ہیں، بچوں کو اٹھا لیا جاتا ہے، زیور اور پیسے لے جاتے ہیں اور خود ہیجڑوں سے مار کھاتے ہیں۔‘
کیسوں اور پیشیوں سے تنگ آگئے روز روز کی چخ چخ سے بہتر ہے ایک ہی بار سزا دے دیں ، شیخ رشید کی عدالت پیشی ہے بعد میڈیا سے گفتگو pic.twitter.com/wO3sT4i2jF
— Hussain Ahmed Ch (@HussainAhmedCh8) May 15, 2024
سابق وفاقی وزیر کا کہنا ہے کہ ان کے خلاف مقدمات میں کوئی گواہی نہیں، اسلام آباد کی 3 عدالتوں میں پیش ہونا ہے، حکومت کا انجن دھواں دیتا ہوا نظر آرہا ہے، 30 جون سے سیاست میں بڑی تبدیلی متوقع ہے۔
شیخ رشید کے مطابق 9 مئی کے واقعات پر جوڈیشل کمیشن کا قیام سب کا مطالبہ ہے، اس ملک میں انصاف کا مذاق بنایا جا رہا ہے، انصاف کا پوسٹ مارٹم کیا جا رہا ہے، اس ملک میں لوگوں کو عدلیہ سے انصاف کی امید ہے۔
انہوں نے واضح کیا کہ وہ پی ٹی آئی میں شامل نہیں لیکن ان کا بانی پی ٹی آئی تعلق ہے، مہنگائی کے خلاف لوگ ایسے ہی نکلیں گے جیسے کشمیر اور راولا کوٹ میں نکلے۔
راولپنڈی کی انسدادِ دہشت گردی کی عدالت میں شیخ رشید کی جانب سے بریت کی درخواست دائر کی گئی ہے، شیخ رشید اپنے خلاف مقدمات کی آئندہ سماعت کے لیے 29 مئی کو اڈیالہ جیل میں پیش ہوں گے۔
