ملک بسم اللہ کا تعلق کالاباغ کے نواحی علاقہ تخت ریشوڑہ سے ہے۔ 26 سالہ بسم اللہ کا قد محض 3 فٹ 5 انچ ہے۔ ان کے دونوں ہاتھوں کی انگلیاں بھی صحیح نہیں ہیں۔ انہوں نےمیٹرک تک تعلیم مقامی اسکول سے حاصل کی جس کی باعث پڑھائی کو خیر باد کہہ دیا کیونکہ انہیں بچپن سے ہی کاروبار کرنے کا شوق تھا۔
جسمانی معذوری کو مجبوری بنانے کی بجائے ملک بسم اللہ نے کام سیکھنے کو ترجیح دی اور موبائل ریپئرنگ سیکھنے اسلام آباد چلے گئے۔
وی نیوز سے بات کرتے ہوئے ان کا کہنا تھا کہ موبائل ریپئرنگ کی فیلڈ میں آنے کی بنیادی وجہ یہ تھی کہ یہ ایک ماڈرن کام تھا جس کی مانگ بہت تھی، اور دوسرا یہ کہ وہ کوئی سخت کام تو کر نہیں کر سکتے تھے۔
انہوں نے 2 سال اسلام آباد میں ایک موبائل شاپ پر موبائل مرمت کا کام سیکھا۔ انہوں نے اپنے استاد کی تعریف کرتے ہوئے کہا کہ وہ بہت اچھے انسان تھے اور انہوں نے بہت اچھے طریقے سے موبائل مرمت کا کام سکھایا۔
کام کی ٹریننگ کرنے کے بعد ملک بسم اللہ کالاباغ آگئے اور لاری اڈا میں کرایہ پر دکان حاصل کی۔ یہاں وہ بہت خوش ہیں کیونکہ کام بھی اچھا ہے اور لوگ بھی انہیں بہت اچھے طریقے سے ملتے ہیں، ان سے گپ شپ لگاتے ہیں اور حوصلہ افزائی کرتے ہیں۔
ملک بسم اللہ کا کہنا ہے کہ انہوں نے بھیک مانگنے اور کسی کے آگے ہاتھ پھیلانے کی بجائے کام کرنے کو ترجیح دی اور عرصہ 5 سال سے کالاباغ میں موبائل ریپئرنگ کا کام کر رہے ہیں۔
ان کہنا تھا کہ کوئی ذرا سا بھی معذور ہوتا ہے تو وہ کام چھوڑ کر بھیک مانگنا شروع ہو جاتا ہے۔ ایسے لوگوں کو میرا پیغام ہے کہ کوئی ہنر سیکھیں اور کام کریں تا کہ بھیک مانگنے جیسے شرمناک عمل سے بچ سکیں۔
ان کا کہنا تھا کہ اگر کوئی نوجوان ان سے موبائل ریپئرنگ کا کام سیکھنا چاہے تو وہ اسے ٹریننگ دینے کو تیار ہیں تا کہ وہ باعزت روزگار کما سکے۔
بسم اللہ خان کی خواہش ہے کہ وہ حج کرنے کے ساتھ ساتھ خلق خدا کی خدمت کریں۔
