پی آئی اے نے فیصل آباد اور کراچی کے درمیان فضائی رابطہ بحال کردیا

پاکستان انٹرنیشنل ایئرلائن (پی آئی اے) نے فیصل آباد اور کراچی کے درمیان فضائی رابطہ بحال کردیا۔

ترجمان پی آئی اے کے مطابق 7 ماہ کے بعد پی آئی اے کی پہلی پرواز کراچی اور فیصل آباد کے درمیان آپریٹ کی گئی، اب دونوں شہروں کے درمیان پی آئی اے ہفتہ وار 4 پروازیں چلائے گی۔

ترجمان نے بتایا کہ پہلی پرواز سے 170 مسافر روانہ ہوئے۔ ’ان پروازوں کے اجرا کے بعد فیصل آباد سے براستہ کراچی بیرون ملک سفر کرنے والے مسافروں کو بھی سہولت میسر آئے گی‘۔

ترجمان پی آئی اے کے مطابق ان پروازوں کی دوربارہ شروعات سے فیصل آباد کی کاروباری برادری اور گردو نواح کے لوگوں کو تیز رفتار سفر کی سہولت میسر آگئی ہے۔

ترجمان نے بتایا کہ فیصل آباد ایئر پورٹ پر پرواز کی روانگی کے وقت کیک کاٹا گیا اور مسافروں کو پھول پیش کیے گئے۔

ترجمان کے مطابق مسافروں کو پی آئی اے کے ڈسٹرکٹ مینیجر شاہد حسین، اسٹیشن مینیجر محمد عرفان، سول ایوی ایشن اور اے ایس ایف حکام نے رخصت کیا۔