پاک بھارت میچ کے دوران ’ریلیز عمران خان ‘ کا بینر فضا میں لہرانے والا کون تھا؟

گزشتہ روز نیو یارک میں پاکستان اور انڈیا کے مابین کھیلے گئے اہم ٹی20 ورلڈ کپ کے اہم میچ سے قبل اسٹیڈیم کے اُوپر سے طیارے سے ’ریلیزعمران خان‘ کا بینر فضا میں لہرایا گیا، اس واقعہ کی ویڈیو سوشل میڈیا پر وائرل ہوئی تو ہر ایک یہی سوال پوچھتا نظر آیا کہ آخر یہ کارنامہ کس کا ہے؟

سماجی رابطے کی ویب سائٹ ایکس پر اس سوال کا جواب تب ملا، جب ایک صارف غازی خان نے اس بات کی تصدیق کی کہ یہ بینر کیمپین ان کی تھی، امریکا میں مقیم پاکستانی شہری غازی خان ایک سائبر سیکیورٹی پروفیشنل ہیں اور ان کے اکاؤنٹ کا جائزہ لیا جائے تو وہ عمران خان کے حامی نظر آتے ہیں۔

ایکس پر پوسٹ کرتے ہوئے غازی خان نے لکھا کہ بھارت بمقابلہ پاکستان کرکٹ میچ کے دوران فضائی پیغام رسانی مہم ’ریلیزعمران خان‘ پر کام کرنا ایک اعزاز کی بات تھی، عمران خان کا دیا ہو ا نظریہ کبھی بھلایا نہیں جاسکتا، بیرون ملک مقیم پاکستانی ہمیشہ عمران خان کے ساتھ کھڑے رہیں گے۔

It was an honor to work on the Aerial Messaging campaign #ReleaseImranKhan during the India vs. Pakistan cricket match. The ideology of @ImranKhanPTI cannot be suppressed or forgotten. Overseas Pakistanis stand with Imran Khan and always will.

Thanks to @MalikUs64816178,… pic.twitter.com/kDPF2C6XJa

— GhaaziKhan (@junaidkj) June 9, 2024

غازی خان نے اپنی ایکس پوسٹ میں کچھ اور پاکستانی شہریوں کا بھی شکریہ ادا کیا جنہوں نےاس مقصد میں ان کا ساتھ دیا اور ساتھ ہی اس جہاز سے لی گئی کچھ تصاویر شیئر کی جس کے ذریعے ’ریلیز عمران خان‘ کا بینر فضا میں لہرایا گیا۔

غازی خان نے اپنی ایکس پوسٹ میں فرسٹ پاکستان گلوبل نامی ادارے کا بھی شکریہ ادا کیا ، یہ ادارہ دنیا بھر میں پاکستانیوں کے حقوق اور مفادات کے تحفظ کے لیے ایک متحد آواز فراہم کرتی ہے، اس کے علاوہ پاکستان تحریک انصاف کے دور حکومت میں وزرات  اوورسیز پاکستانی  کے فوکل پرسن عاطف خان بھی اس مہم میں شامل تھے۔