بھارتی وزیراعظم نریندر مودی نے سابق وزیراعظم پاکستان نواز شریف کی جانب سے مبارکباد پر کہا ہے کہ میں آپ کے پیغام کی قدر کرتا ہوں۔
سماجی رابطے کی ویب سائٹ ’ایکس‘ پر اپنی ٹوئٹ میں نریندر مودی نے لکھا کہ بھارتی عوام کی خوشحالی اور سیکیورٹی ہمیشہ ہماری ترجیح رہے گی کیونکہ یہاں کے عوام ہمیشہ امن، سیکیورٹی اور ترقی پسند خیالات کے حامی رہے ہیں۔
Appreciate your message @NawazSharifMNS. The people of India have always stood for peace, security and progressive ideas. Advancing the well-being and security of our people shall always remain our priority. https://t.co/PKK47YKAog
— Narendra Modi (@narendramodi) June 10, 2024
قبل ازیں سابق وزیراعظم و صدر پاکستان مسلم لیگ ن میاں نواز شریف نے بھارتی وزیراعظم نریندر مودی کو وزارت عظمیٰ کا حلف اٹھانے پر مبارکباد پیش کی تھی۔
سماجی رابطے کی ویب سائٹ ’ایکس‘ پر اپنے ایک بیان میں نواز شریف نے کہاکہ آئیں نفرت کو امید سے بدلیں اور جنوبی ایشیا کے 2 ارب لوگوں کی تقدیر بدلنے کے لیے اس موقع سے فائدہ اٹھائیں۔
انہوں نے نریندر مودی کو مخاطب کرتے ہوئے کہاکہ آپ کی پارٹی کی تیسری بار کامیابی آپ کی قیادت پر بھارتی عوام کے اعتماد کی عکاسی کرتی ہے۔
واضح رہے کہ نریندر مودی نے گزشتہ روز تیسری مدت کے لیے وزارت عظمیٰ کا حلف اٹھایا، حلف برداری کی تقریب میں اہم شخصیات نے شرکت کی تھی۔
