ٹماٹر پیوری کے ریویو پر خاتون کو جیل کیوں جانا پڑا؟

16 ستمبر 2023 کی بات ہے جب چیوما اوکولی نے اپنے فیس بک پیج پر ناگوتیڈو، لاگوس کی ایک مارکیٹ سے خریدی گئی ناگیکو ٹماٹر پیوری (tomato puree) کا ایک جائزہ پوسٹ کیا تھا۔ وہ اپنے چھوٹے کاروباری صفحے پر چند ہزار فالوورز کو بتا رہی تھیں کہ اس کا ذائقہ دیگر مصنوعات کے مقابلے میں زیادہ میٹھا ہے، وہ ان فالوورز سے پوچھ رہی تھیں جنہوں نے اسے آزمایا تھا۔

’الجزیرہ‘ کے مطابق اس پوسٹ کو مختلف آرا موصول ہوئیں، لیکن یہ اس وقت عروج پر پہنچ گئی جب ایک فیس بک صارف نے تبصرہ کیا کہ میرے بھائی کی مصنوعات کو خراب کرنا بند کرو، اگر آپ اسے پسند نہیں کرتے ہیں تو اسے سوشل میڈیا پر لانے کے بجائے کچھ اور استعمال کریں۔

اوکولی نے جواب دیتے ہوئے کہا تھا کہ اپنے بھائی کو مشورہ دینے میں میری مدد کریں کہ وہ اپنی مصنوعات کے ساتھ لوگوں کو دھوکا دینا بند کردیں۔ 2 دن بعد اس پوسٹ پر 2500 سے زائد تبصرے کیے گئے جس سے وہ حیران رہ گئیں۔

چیوما اوکولی نے بتایا کہ اس اتوار کو جب وہ اپنے شوہر کے ساتھ گرجا گھر سے باہر نکل رہی تھیں تو سادہ کپڑوں میں ملبوس 2 مردوں اور ایک خاتون نے ان پر حملہ کیا اور کہا کہ وہ پولیس اہلکار ہیں۔ وہ اسے چرچ کے لباس میں ہی اوگوڈو پولیس اسٹیشن لے گئے۔

تین بچوں کی 39 سالہ ماں چیوما اوکولی کہتی ہیں کہ وہ مجھے ایک کمرے میں لے گئے، اور وہ 20 سے زیادہ صفحات لائے اور مجھے بتایا کہ یہ الزامات ہیں۔ وہ مجھ پر بھتہ خوری، بلیک میلنگ کا الزام لگا رہے تھے اور یہ کہ میں ایک سنڈیکیٹ چلاتی ہوں۔

اوکولی ان متعدد نائجیریائی باشندوں میں سے ایک ہے جنہیں ملک کے سائبر کرائم قوانین کی مبینہ خلاف ورزی کرنے پر گرفتار کیا گیا، حراست میں لیا گیا یا ان پر فرد جرم عائد کی گئی، جس کا مقصد اہم قومی معلومات کو محفوظ کرنے کے ساتھ ساتھ شہریوں کو سائبر اسٹاکنگ سے بچانا ہے۔ انسانی حقوق کی تنظیموں کا کہنا ہے کہ اسے صحافیوں، کارکنوں، منحرفین اور یہاں تک کہ عام لوگوں کے خلاف بھی استعمال کیا جا رہا ہے جو آزادی اظہار کا اظہار کرتے ہیں۔

اوکولی کی گرفتاری کے ایک دن بعد، اسے پولیس فورس کے ہیڈ کوارٹر میں پوچھ گچھ کے لیے دارالحکومت ابوجا لے جایا گیا، جہاں اسے کچھ دنوں تک حراست میں رکھا گیا۔ ناگیکو ٹماٹر پیوری بنانے والی کمپنی ایریسکو فوڈ لمیٹڈ کے سی ای او ایرک امیوفیا بھی اسٹیشن پر آئے۔ اوکولی کو ایک دفتر میں ان سے ملنے لایا گیا تھا جہاں وہ ان پر چیخ رہے تھے جبکہ وہ رو رہی تھیں۔

ایرک امیوفیا نے چلاتے ہوئے کہا کہ یہ تم ہی ہو جو میرے 40 سال کے کاروبار کو تباہ کرنا چاہتی ہو، کسی نے میرے کاروبار کو تباہ کرنے کے لیے تمہیں پیسے دیے ہیں، مجھے اس شخص کا نام بتاؤ جس نے تمہیں پیسے دیے ہیں۔

امیوفیا نے اوکولی سے معافی مانگنے کا مطالبہ کیا اور کہا کہ وہ اپنے سوشل میڈیا اور 3 قومی اخبارات میں بھی معافی پر مبنی بیان پوسٹ کریں۔ کمپنی نے اوکولی کے خلاف سول مقدمہ بھی دائر کیا جس میں 5 بلین نیرا (3 ملین ڈالر سے زائد) ہرجانے کا مطالبہ کیا گیا تھا۔

اوکولی نے کہا کہ اس نے دو بار ایک بیان لکھا لیکن دونوں کو مسترد کر دیا گیا اور اسے پہلے سے تیار کردہ اعترافی بیان کاپی کرنے کے لیے کہا گیا۔ میں نے رہائی کے لیے اسے قبول کرلیا اور انہوں نے مجھے 3 دن بعد چھوڑ دیا۔

اوکولی کہتی ہیں کہ اس تکلیف کے دوران وہ بیمار پڑ گئیں اور اس کے چھوٹے سے کاروبار کا فیس بک پیج، جس کے ذریعے وہ درآمد شدہ بچوں کے کپڑے بیچتی ہیں، کو بھی ہیک کرلیا گیا تھا۔ اس تجربے نے اسے بدل دیا ہے۔ اب وہ گھر کے اندر اور عوام سے دور رہنے کو ترجیح دیتی ہیں۔