ایف آئی اے کی کارروائی، جعلسازی سے بیرون ملک جانے کی کوشش کرنے والا مسافر ایجنٹ سمیت گرفتار

جعلسازی سے بیرون ملک جانے کی کوشش کرنے والے مسافر کو ایجنٹ سمیت کراچی ایئرپورٹ پر آف لوڈ کر دیا گیا ہے۔

ترجمان ایف آئی اے کے مطابق ایف آئی اے امیگریشن نے کراچی ایئرپورٹ پر بڑی کارروائی کرتے ہوئے ملزم عادل حسین اور اللہ بچایو کو گرفتار کرلیا ہے، ملزمان فلائٹ نمبر XY314 کے ذریعے سعودی عرب جارہے تھے، جن کے پاسپورٹ پر سعودی عرب کے بزنس ویزے لگے ہوئے تھے۔

امیگریشن کے دوران ملزمان اپنے کاروبار کے حوالے سے کسی قسم کی تفصیلات دینے میں ناکام رہے، ابتدائی تفتیش میں یہ بات سامنے آئی ہے کہ ملزم عادل حسین نے مذکورہ ویزا حاصل کرنے کے لیے ایجنٹ اللہ بچایو کو 14 لاکھ روپے ادا کیے تھے۔

گرفتار ایجنٹ اللہ بچایو سہولتکاری کے طور پر ملزم عادل حسین کے ساتھ سعودی عرب جارہا تھا، ایجنٹ نے سعودی عرب پہنچ کرعادل حسین کے لیے نوکری کا بندوبست کرنا تھا، ملزم اللہ بچایو نے بھاری رقم کے عوض ملزم کو ورک ویزے کے بجائے بزنس ویزا لگوا کر دیا تھا۔

ملزمان کو مزید قانونی کارروائی کے لیے اینٹی ہیومین ٹریفکنگ سرکل کراچی منتقل کردیا گیا ہے، جہاں ان سے تفتیش جاری ہے۔