پاکستان کی کارگو کمپنی ٹی سی ایس نے پاکستان سے براستہ قازقستان، آذربائیجان تک سامان ترسیل کرکے ایک بڑا سنگ میل عبور کرلیا ہے۔
پاکستانی ٹرانسپورٹ اور لاجسٹک کمپنی ٹی سی ایس ملک گیر سامان کی ترسیل کے ساتھ ساتھ بین الاقوامی سطح پر بھی یہ سلسلہ جاری رکھے ہوئے ہے ، جس نے پاکستان سے براستہ قازقستان، آذربائیجان تک سامان کی ترسیل مکمل کر لی ہے، ٹی سی ایس نے لاجسٹک آپریشن کا آغاز کراچی بندرگاہ سے کیا اور اکتاؤ کی کیسپین بندرگاہ سے ہوتے ہوئے باکو میں اختتام کیا۔
مزید پڑھیں
پاکستان سے بذریعہ قازقستان، آذربائیجان میں سامان کی ترسیل کا مقصد دونوں ممالک کے مابین تجارتی روابط کو بڑھانا تھا، ٹی سی ایس کے اس لاجسٹک آپریشن میں قازقستان کے سفارتخانے نے بھرپور تعاون فراہم کیا، اس کارگو ترسیل سے قازقستان کے ٹرانزٹ ٹرانسپورٹ کی صلاحیت کو بڑھانے میں مدد ملے گی۔
قازقستان کی وزارت خارجہ کے مطابق پاکستانی فارماسیوٹیکل مصنوعات کو پاکستان سے بذریعہ قازقستان، آذربائیجان پہنچنے میں 21 دن لگے جس کے دوران کل 4 ہزار820 کلومیٹر کا طویل راستہ طے کیا گیا
پاکستانی لاجسٹک ماہرین کے مطابق ٹرانس افغان کوریڈور اور ٹرانس کیسپین انٹرنیشنل ٹرانسپورٹ روٹ، قراقرم ہائی وے کے ساتھ مل کر قازقستان اور پاکستان کی ٹرانزٹ صلاحیتوں کو بڑھانے کے لیے اہم کردار ادا کرسکتے ہیں۔