شاہ محمود قریشی کے بیٹے اور پی ٹی آئی کے رہنما زین قریشی نے دعویٰ کیا ہے کہ بانی پی ٹی آئی عمران خان اور ان کے والد شاہ محمود قریشی کو آج اڈیالا جیل میں عید الاضحیٰ کی نماز ادا نہیں کرنے دی گئی۔
مزید پڑھیں
زین قریشی کا ملتان میں میڈیا سے گفتگو میں کہنا تھا کہ والد شاہ محمود قریشی کے بغیر یہ دوسری عید ہے، انہوں نے حقیقی قربانی دی ہے، امید ہے عید کے بعد شاہ محمود قریشی رہا ہو جائیں گے۔
زین قریشی نے دعویٰ کیا کہ بانی پی ٹی آئی عمران خان اور والد کو آج بھی اڈیالا جیل میں عید کی نماز پڑھنے نہیں دی گئی۔ان کے مطابق سائفرکیس سیاسی انتقام تھا، ہائیکورٹ نے اس کیس میں باعزت بری کیا تو حکومت نے 9مئی کے بے بنیاد کیسز بنا دیے۔
پی ٹی آئی رہنما کے مطابق ہم نے کبھی مذاکرات سے انکار نہیں کیا، عام انتخابات اور 9مئی کی تحقیقات ہمارا مطالبہ ہے۔
زین قریشی کا کہنا تھا کہ پیپلز پارٹی نے پہلے بھی مل کر حکومت بنانے کی دعوت دی، ہم نے اصولی مؤقف اختیار کیا، تحریک انصاف کے باہم کوئی اختلاف نہیں۔
انہوں بجٹ پر تبصرہ کرتے ہوئے کہا کہ بجٹ میں عوام کو کوئی ریلیف نہیں ملا ہے، یہ آئی ایم ایف دوست بجٹ ہے۔
واضح رہے کہ گزشتہ عید الفطر پر شاہ محمود قریشی کی صاحبزادی مہربانو نے کہا تھاکہ والد اور بانی پی ٹی آئی عمران خان نے باجماعت نماز عید ادا نہیں کی، انہیں اپنے اپنے سیل میں رکھا گیا تھا۔
