وزیراعلیٰ مریم نواز شریف کا عید کے 3 دن جاری رہنے والا ’آپریشن کلین اپ‘ آج مکمل ہوگا۔ عیدالاضحی پر 72 گھنٹے میں مسلسل صفائی، عرق گلاب ملے پانی سے سڑکوں، گلیوں اور راستوں کی دھلائی، آلائشیں اٹھا کر پنجاب میں سرکاری مشینری نے ناممکن کو ممکن کر دکھایا۔
وزیراعلیٰ مریم نواز شریف کا صفائی مہم میں شریک تمام میونسپل اداروں، ویسٹ مینجمنٹ کمپنوں، ضلعی انتظامیہ، لاہور ویسٹ مینجمنٹ کمپنی کے افسران اور عملے کو بھی خراج تحسین پیش کیا۔ ان کا کہنا تھا کہ حکومت، منتخب نمائندوں، اداروں، افسران اور عملے کے لیے اصل عیدی عوام کی شاباش ہے۔
مزید پڑھیں
ان کا کہنا تھا کہ آپ کے ٹیم ورک نے عوامی خدمت اور ’یہ ممکن ہے‘ کی سنہری اور قابل فخرمثال قائم کی ہے۔ بڑی عید پر صفائی کا بڑا سٹینڈرڈ بنا جسے قائم رکھنا ہے۔ سالڈ ویسٹ مینجمنٹ کا جامع نظام لا رہے ہیں، سب اپنی ذمہ داری نبھا کر ’ستھرا پنجاب‘ کو حقیقت بنائیں گے۔
وزیراعلیٰ پنجاب نے کہا کہ شہریوں اور میڈیا کا بھی شکریہ جن کے تعاون سے یہ ممکن ہوا، سب نے اپنی ذمہ داری خوب نبھائی، جس کی وجہ سے نا ممکن، ممکن ہوا، آئیں ہم سب مل کر اسی جذبے اور تعاون سے ’ستھرا پنجاب‘ کو مستقل معیار بنائیں۔ اب یہ نعرہ نہیں رہا، پنجاب کی حکومت اور عوام نے کرکے دکھایا ہے۔
