اگر آسٹریلیا اور افغانستان کے میچ بارش کی نذر ہوگئے تو سیمی فائنل میں کون پہنچے گا؟

ورلڈ کپ2024 سنسنی خیز مرحلے میں داخل ہوچکا ہے، جہاں 8ٹیمیں ایک دوسرے کے مدمقابل ہیں اور سیمی فائنل کی دوڑ میں ایک دوسرے سے آگے نکلنے کی کوششوں میں مصروف ہیں۔ گروپ 2 میں سے دونوں ٹیمیں سیمی فائنل میں پہنچ چکی ہیں، لیکن گروپ 1 میں صرف بھارت کی پوزیشن بظاہر مستحکم ہے، جبکہ آسٹریلیا، بنگلادیش اور افغانستان میں سے کوئی ایک ٹیم سیمی فائنل کے لیے کوالیفائی کرسکے گی۔

موسم کا حال بتانے والی ویب سائٹ کے مطابق ورلڈ کپ کے اگلے میچز بارش کی نذر ہونے کا امکان ہے، گروپ ون کے بقیہ میچز کا سب کچھ موسمی حالات پر منحصر ہے۔ اگر آسٹریلیا اور بھارت کا میچ واش آؤٹ ہوا تو دونوں ٹیموں کو ایک ایک پوائنٹ ملے گا۔ اس صورت میں، بھارت سیمی فائنل میں پہنچ جائے گا، اور آسٹریلیا کو اپنا سامان باندھنا پڑے گا، اور افغانستان اور بنگلادیش میں سے جو بھی جیتے گا اچھے رن ریٹ کی بدولت سیمی فائنل میں پہنچے گا۔

آسٹریلیا کو افغانستان کے ہاتھوں اہم میچ میں شکست ک سامنا کرنا پڑا جس نے آسٹریلیا کے لیے مشکلات کھڑی کردی ہیں۔  گروپ 1 میں سے ابھی تک تمام ٹیمیں 2،2 میچز کھیل چکی ہیں، جن میں سے بھارت نے اپنے دونوں میچز جیتے ہیں، جبکہ آسٹریلیا اور افغانستان نے ایک ایک میچ جیتا ہے اور بنگلا دیش اپنے ابھی تک کے دونوں میچ ہار چکا ہے۔

موسم کے پیش نذر پوائنٹس ٹیبل پر کافی کچھ تبدیل ہوسکتا ہے، لیکن اگر میچ واش آؤٹ نہیں ہوتے تو یہ بھی ممکن ہے کہ آسٹریلیا بھارت کو ہرا دے، اور افغانستان بنگلادیش کو، اس صورت میں تینوں ٹیموں کے پوائنس 4 ہوجائیں گے اور رن ریٹ یا زیادہ چھکے لگانے کی بنیاد پر 2 ٹیمیں سیمی فائنل کے لیے کوالیفائی کرجائیں گی۔

موسم کیا کہتا ہے؟

موسم کی پیش گوئی کرنے والے اداروں کے مطابق آج کے میچ میں بارش ہونے کا 70 فیصد امکان ہے، جبکہ بادل چھائے رہنے کی توقع 74 فیصد ہے۔ ایک ادارے نے 3.5 ملی میٹر بارش کی پیش گوئی کر رکھی ہے۔

اعدادوشمار کیا کہتے ہیں؟

بھارت کے پاس اس وقت 4 پوائنٹس اور نیٹ رن ریٹ +2.425 ہے، آسٹریلیا کے پاس 2 پوائنٹس اور +0.223 کا نیٹ رن ریٹ ہے۔ اسی طرح افغانستان کا نیٹ رن ریٹ منفی 0.650 جبکہ بنگلا دیش کا منفی 2.489 ہے۔