لاہور کے تاریخی ورثہ کی بحالی میں نوازشریف کی دلچسپی

سابق وزیراعظم نواز شریف نے والڈ سٹی اتھارٹی کو لاہور شہر کے تاریخی اور قدیمی ورثہ کی بحالی کے لیے کام جاری رکھنے کی ہدایت کی ہے۔

سابق وزیراعظم و مسلم لیگ (ن) کے صدر محمد نواز شریف سے والڈ سٹی اتھارٹی کے ڈائریکٹر جنرل کامران لاشاری نے ملاقات کی، ملاقات میں اندرون لاہور کی قدیمی اور تاریخی عمارتوں کی ماضی کی آب و تاب کی بحالی کے امور پر تفصیلی تبادلہ خیال کیا گیا۔

کامران لاشاری نے سابق وزیراعظم نواز شریف کو لاہور کی تاریخی عمارتوں کی بحالی کے جاری منصوبے سے آگاہ کیا، ڈی جی والڈ سٹی نے شاہی قلعہ اور لاہور کے قدیمی دروازوں کی بحالی کے بارے میں بھی نواز شریف کو بریفنگ دی۔

اس موقع پر سابق وزیراعظم نواز شریف نے اندرون لاہور کی تاریخی حیثیت کی بحالی پر والڈ سٹی اتھارٹی کی خدمات اور پیشہ ورانہ مہارت کو سراہا اور شہر کی شاندار تاریخی عمارتوں کی بحالی کا عمل جاری رکھنے پر اتفاق کیا۔

ملاقات میں وفاقی وزیر خواجہ آصف، خواجہ سعد رفیق، انوشہ رحمان، وزیراعلیٰ پنجاب مریم نوازشریف کے معاون خصوصی راشد نصر اللہ، ذیشان اور دیگر بھی موجود تھے۔