ملکی سیاست میں حکومتی اتحاد سے مذاکرات کے رودار نہ ہونے کے باوجود تحریک انصاف کے سوشل میڈیا کی جانب سے مسلم لیگ ن کے حال ہی میں نامزد ہونیوالے سوشل میڈیا ٹیم کے سربراہ صفدر لغاری کو تہنیتی پیغام بھیجا ہے۔
حکمراں جماعت مسلم لیگ ن کی سوشل میڈیا ٹیم کے نامزد سربراہ صفدر لغاری کو سماجی رابطے کی ویب سائٹ ایکس پر مبارکباد دیتے ہوئے تحریک انصاف میں ان کے ہم منصب جبران الیاس نے ان سے دو محاذ پر پیش رفت کا مشورہ دیا ہے۔
آپ کو یہ عہدہ بہت مبارک ہو @leghari_safdar
دو چیزوں پر اصرار کریں اپنی قیادت سے، جس سے آپ کو لوگ مانیں گے:
۱) فسطائیت کو ریجیکٹ کریں تا کہ سب کھل کے اپنی بات رکھیں-
۲) ٹویٹر کھلوائیں تا کہ سب دلیل کے ساتھ بات کر کے پاکستان کو آگے بڑھائیں۔ https://t.co/yXDWFV9Aci
— Jibran Ilyas (@agentjay2009) June 27, 2024
’دو چیزوں پر اصرار کریں اپنی قیادت سے، جس سے آپ کو لوگ مانیں گے، فسطائیت کو ریجیکٹ کریں تا کہ سب کھل کے اپنی بات رکھیں۔۔۔ ٹوئیٹر کھلوائیں تا کہ سب دلیل کے ساتھ بات کر کے پاکستان کو آگے بڑھائیں۔‘
واضح رہے کہ تحریک انصاف کے جبران الیاس کی جانب سے مذکورہ پیغام ایکس پر صفدر لغاری کی جانب سے مریم نواز کے لیے تشکر کے پیغام پر مبنی پوسٹ کے جواب میں کیا گیا تھا۔
صفدر لغاری نے بطورِ سوشل میڈیا ہیڈ اپنی نامزدگی پر وزیر اعلیٰ پنجاب اور سینیئر نائب صدر مسلم لیگ ن مریم نواز شریف کا شکریہ اداکرتے ہوئے اپنے پارٹی فرائض کی انجام دہی کے لیے تجاویز بھی طلب کی ہیں۔
’میں مریم نواز شریف صاحبہ کا انتہائی مشکور ہوں جنہوں نے مجھے موقع دیا، میں اس محاذ پر تمام سوشل میڈیا رضا کاروں کی حمایت سے قائد جناب نواز شریف اور پاکستان مسلم لیگ ن کا پرچم بلند رکھوں گا۔‘
صفدر لغاری نے اپنی پوسٹ میں تمام دوستوں سے گزارش کی ہے کہ ان کی حالیہ ذمہ داریوں کے پیش نظر انہیں اپنی تجاویز سے ضرور آگاہ کریں تاکہ اس کے عین مطابق نعرہ حق بلند کرتے ہوئے قدم بڑھایا جاسکے۔