معروف بالی ووڈ اداکارہ اور سابق مس یونیورس سشمیتا سین نے جب اپنے انسٹاگرام پر اپنے دوسرے جنم اور اس کی تاریخ کے بارے میں انکشاف کیا تو صارفین حیران رہ گئے۔
مزید پڑھیں
ہوا یوں کہ گزشتہ ہفتے سشمیتا سین نے اپنے انسٹاگرام پر اپنے دوسرا تاریخ پیدائش ایڈ کیا۔ اپنی بائیو میں انہوں نے لکھا، ’سیکینڈ ڈیٹ آف برتھ 27/02/2023۔‘
سشمیتا کی جانب سے نیا یوم پیدائش لکھے جانے پر ان کے مداح حیران تھے کہ آخر معاملہ کیا ہے۔ پھر اداکارہ نے اپنے دوسرے جنم کے راز سے پردہ اٹھا ہی دیا۔
48 سالہ بالی ووڈ اداکارہ سشمیتا نے بتایا کہ یہ وہ دن ہے جب انہیں دل کا شدید دورہ پڑا تھا جس کے اگلے 45 منٹ ان کی زندگی کے مشکل ترین لمحات تھے۔
ایک ویڈیو میں اس واقعہ کا ذکر کرتے ہوئے سشمیتا نے مزید بتایا کہ ان کی زندگی ایک کہانی کی طرح ہے جس میں ایک ایسا موڑ بھی آیا جس نے ان کی زندگی بدل دی۔
ان کا کہنا تھا، ’جب مجھے ہارٹ اٹیک ہوا تو مجھے لگا کہ میری زندگی کی کہانی ختم ہوگئی ہے لیکن میں اپنے ڈاکٹرز کی شکرگزار ہوں جن کے سبب میری زندگی کی کہانی ابھی جاری ہے۔‘
سشمیتا سین نے کہا کہ ڈاکٹرز نے میری زندگی کی نئی کہانی لکھی اور مجھے ایک نئی سمت دی، یہ میرا دوسرا یوم پیدائش تھا، میں یہ دن اور اپنی کہانی تمام ڈاکٹرز کے نام کرتی ہوں۔‘
View this post on Instagram
واضح رہے کہ بالی ووڈ اداکارہ سشمیتا سین کو گزشتہ برس اس وقت دل کا دورہ پڑا تھا جب وہ ڈزنی اور ہاٹ اسٹار کی مشترکہ پیشکش ’آریا‘ کی جے پور میں ریکارڈنگ میں مصروف تھیں۔ 48 سالہ اداکارہ کا اصل یوم پیدائش 19 نومبر 1975 ہے۔
سشمیتا سین نے ایک طویل وقفے کے بعد کرائم ایکشن ویب سیریز ’آریا‘ سے دوبارہ اداکاری کا آغاز کیا تھا۔ بعد ازاں، انہوں نے ڈرامہ سیریز ’تالی‘ میں بھی اداکاری کے جوہر دکھائے، اس ڈرامہ میں انہوں نے ایک خواجہ سرا کا کردار ادا کیا تھا۔
