یورو چیمپئن شپ کے پری کوارٹر فائنل کے دوران ترک فٹبالر میری ڈیمرال کے جشن منانے کے مخصوص انداز پر جرمنی اور ترکیہ کے درمیان تنازع کھڑا ہو گیا ہے۔
جرمنی کے لیپزنگ گراؤنڈ میں آسٹریا کے خلاف میچ میں ترکش فٹبالر میری ڈیمرال نے دوسرا گول کرنے کے بعد شائقین کی طرف دیکھتے ہوئے اپنے دونوں ہاتھوں سے ایک علامتی نشان بنایا تھا، جس پر جرمنی نے اعتراض کیا تھا، کیوں کہ میری ڈیمرال کا بنایا جانے والا علامتی نشان ترکیہ کی سیاسی جماعت ترکیہ نیشنل موومنٹ کے عسکری ونگ ’گرے وولفر‘ کی علامت سمجھا جاتا ہے۔
یہ بھی پڑھیں : 6 سیکنڈ میں تیز ترین گول کرنے کا عالمی ریکارڈ کس فٹبالر نے قائم کیا؟
فرانس اور آسٹریا میں گرے وولفر پر پابندی ہے، تاہم جرمنی میں اس پر کوئی پابندی نہیں، ترکش فٹبالر کی جانب سے علامتی نشان بنانے پر جرمن وزیرِ داخلہ نینسی فیسر نے اپنے ردِ عمل میں کہا کہ ترکیہ کی شدت پسند تنظیم کے نشان کی ہمارے گراؤنڈ میں کوئی جگہ نہیں ہے۔
انہوں نے سماجی رابطے کی سائٹ ایکس پر ایک بیان میں کہا کہ یورپین فٹبال چیمپئن شپ کو نسل پرستی کے لیے بطور پلیٹ فارم استعمال کرنا ناقابلِ قبول ہے۔
یوریپین فٹبال کی تنظیم یوئیفا کی جانب سے بھی مطالبہ کیا جا رہا ہے کہ وہ ترک فٹبالر کے رویے کی تحقیقات کرے۔
دوسری جانب جرمنی کی انسانی حقوق کی تنظیم سوسائٹی فار تھریٹنڈ پیپلز نے یوئیفا سے مطالبہ کیا ہے کہ وہ ایونٹ کے دوران وولف سیلوٹ کے خلاف کارروائی کرے کیوں کہ وولف سیلوٹ ظلم و ستم کی علامت ہے۔
یہ بھی پڑھیں : برطانوی فٹبالرز جنہیں پاکستان کی جانب سے عالمی اسٹیج پر جلوہ گر ہونے کا اعزاز ملا
دوسری جانب جرمنی ردِ عمل کے بعد ترکیہ کی وزارتِ خارجہ نے فٹبالر میری ڈیمرال کے ایکشن پر جرمن حکام کی جانب سے آنے والا ردِ عمل زائنوفوبیا (غیر ملکیوں سے نفرت) پر مبنی ہے، وزارت خارجہ نے جرمنی کے سفیر کو بھی طلب کیا ہے۔
ترک فٹبالر کا مؤقف کیا ہے؟
ترک فٹبالر ڈیمرال کا کہنا ہے کہ ان کے جشن کے انداز میں کوئی پوشیدہ پیغام نہیں تھا،بقول جس انداز میں خوشی کا اظہار کیا وہ ترکوں کی شناخت ہے۔
یاد رہے کہ ڈیمرال آسٹریا کے خلاف 2 گول کر کے میچ کے بہترین کھلاڑی قرار پائے تھے، میچ کے بعد بات کرتے ہوئے انہوں نے کہا کہ وہ اپنے ترک ہونے پر فخر کرتے ہیں اور میچ کے دوران انہوں نے جو نشان بنایا وہ اسی فخر کا اظہار ہے۔’امید ہے اس طرح جشن منانے کا مزید موقع ملے گا۔‘
یہ بھی پڑھیں : اسٹار فٹبالر میسی کی اہلیہ جذبات کی رو میں کیا کربیٹھیں؟
یہاں یہ بات بھی قابل ذکر ہے کہ یورو چیمپئن شپ میں ترکیہ کی ٹیم 15 سال بعد کوارٹر فائنل میں جگہ بنانے میں کامیاب ہوئی ہے، 6 جولائی کو ترکیہ اور نیدر لینڈ کا کوارٹر فائنل برلن میں کھیلا جائے گا۔
