پاکستانی خاتون کوہ پیما ثمینہ بیگ نے سانس کی تکلیف کے باعث کے ٹو مہم ترک کر دی۔ انہیں کے ٹو کی پہلی چڑھائی کی پلاٹینم جوبلی کے حصے پر اطالوی اور پاکستانی خواتین کوہ پیماؤں پر مشتمل 6 رکنی ٹیم کی قیادت کرنا تھی۔
یہ بھی پڑھیں:ثمینہ بیگ، نائلہ کیانی کی سوشل میڈیا پر نانگا پربت جتنی دھوم
ثمینہ بیگ خواتین کی ٹیم کی قیادت کر رہی تھیں۔ بدقسمتی سے اس مہم کے دوران وہ شدید بیمار ہوگئیں اور سانس لینے میں شدید دشواری کا سامنا کرنا پڑا، جس کے باعث انہوں نے مہم روک دی۔
ثمینہ بیگ کے بھائی محبوب علی نے بتایا کہ ہم نے 3 دن تک ہیلی کاپٹر کا انتظار کیا، لیکن عسکری ایوی ایشن (پاکستان میں دستیاب واحد سروس فراہم کنندہ) انخلا کے تمام تقاضوں کو پورا کرنے کے باوجود موسمی حالات کا بہانہ بنا کر ریسکیو آپریشن نہیں کر سکی۔
یہ بھی پڑھیں:کے ٹو کو سر کرنے کا مشن، 4 پاکستانی خواتین بھی سبز ہلالی پرچم لہرانے کے لیے تیار
نمائندوں اور ڈاکٹروں نے ہمیں بتایا کہ اس کی حالت بگڑ رہی ہے، لہٰذا ہم نے اپنی مدد آپ کے تحت انسانی وسائل اور گھوڑے کے ذریعے ثمینہ کو نکالنے کا فیصلہ کیا۔ ٹیم دن رات چلتے ہوئے دو دن میں اسکولی گاؤں پہنچی۔ ان کے بھائی کا کہنا تھا کہ ہمیں آپ کی دعاؤں کی ضرورت ہے کیونکہ حالات نازک ہیں۔
واضح رہے کہ ثمینہ واحد پاکستانی خاتون ہیں جنہوں نے ماؤنٹ ایورسٹ، کے ٹو، نانگا پربت اور 7 براعظموں کی 7 چوٹیوں پر چڑھ کر سبز پرچم لہرایا۔
