صدر مملکت آصف علی زرداری نے کچھی کینال منصوبے کو ڈیڑھ سال میں مکمل کرنے پر زور دیتے ہوئے کہا ہے کہ کچھی کینال سے بلوچستان کی 7 لاکھ 13 ہزار ایکڑ اراضی سیراب ہوگی۔
ایوان صدر اسلام آباد میں اعلیٰ سطح کے اجلاس میں گفتگو کرتے ہوئے انہوں نے کہاکہ وفاقی حکومت منصوبے کی ترجیحی بنیادوں پر بروقت تکمیل یقینی بنانے کے لیے فنڈز فراہم کرے گی۔
یہ بھی پڑھیں بلوچستان میں قانون نافذ کرنے والے اداروں کی استعداد بڑھائی جائے، صدر آصف علی زرداری
اجلاس میں صدر مملکت کو گرین پاکستان منصوبے کے لیے 6 اسٹریٹجک نہروں کی تعمیر کے بارے میں بریفنگ دی گئی۔
گرین پاکستان منصوبے کے لیے 6 اسٹریٹجک نہروں کی تعمیر کی جائے گی، صدر کو بریفنگ
صدر کو بریفنگ میں بتایا گیا کہ گرین پاکستان منصوبے کے لیے 6 اسٹریٹجک نہروں کی تعمیر کی جائے گی، اسٹریٹجک نہروں میں چشمہ رائٹ بینک، کچھی، رینی، گریٹر تھل، چولستان اور تھر کینال شامل ہیں۔
بریفنگ میں کہا گیا کہ نہروں سے ملکی قابل کاشت رقبہ، لائیو اسٹاک اور ماہی گیری کی صلاحیت بڑھانے میں مدد ملے گی۔
آصف زرداری نے گرین پاکستان منصوبے کے لیے اسٹریٹجک نہروں پر کام شروع کرنے کی ہدایت کرتے ہوئے کہاکہ پانی کا ضیاع روکنے کے لیے اسٹریٹجک نہروں کی کنکریٹ لائننگ کی جائے، آبی تحفظ، پانی کا ضیاع کم کرنے اور پانی کی دستیابی بڑھانے کے لیے پاکستان کے آبپاشی کے شعبے کو جدید خطوط پر استوار کرنا ہوگا۔
یہ بھی پڑھیں بلوچستان کے مسائل سیاسی مذاکرات کے ذریعے حل ہونے چاہیئیں، صدر مملکت آصف زرداری
صدر مملکت نے نہروں کے پاس کے بنجر علاقوں میں ڈرپ آبپاشی کو فروغ دینے کی ضرورت پر زور دیتے ہوئے کہاکہ سرکاری اراضی کے پیداواری استعمال کے لیے عالمی مالیاتی اداروں اور اسٹاک ایکسچینج سے فنڈنگ کے حصول کے لیے اسٹیٹ لینڈ بینک قائم کیا جائے۔
انڈس ریور سسٹم اتھارٹی کی اصلاح اور اسے بہتر بنانے پر زور
صدر آصف علی زرداری نے انڈس ریور سسٹم اتھارٹی کی اصلاح اور اسے بہتر بنانے پر بھی زور دیا۔
بریفنگ میں صدر مملکت کو اس بات سے آگاہ کیا گیا کہ پانی کی دستیابی اور بہاؤ کے حوالے سے درست ڈیٹا شیئرنگ کے لیے 27 ٹیلی میٹری پوائنٹس قائم کیے جائیں گے۔
اجلاس میں وزیر داخلہ محسن نقوی اور اعلیٰ عسکری حکام نے شرکت کی۔
