صدر مملکت آصف علی زرداری نے کہا ہے کہ بلوچستان کے مسائل سیاسی مذاکرات کے ذریعے حل ہونے چاہیئیں، صوبے کی ترقی و خوشحالی موجودہ حکومت کی اولین ترجیح ہے، اسے خوشحال و ترقی یافتہ صوبہ بنا کر استحکام پاکستان کے لیے موثر کردار ادا کریں گے۔
وزیراعلیٰ بلوچستان کی جانب سے دیے گئے عشائیہ سے خطاب کرتے ہوئے صدر مملکت نے کہا کہ بلوچستان اپنے معدنی وسائل اور طویل ساحلی پٹی کی بدولت خاص اہمیت کا حامل ہے، اس کی بنجر زمینوں کو موثر حکمت عملی کے ذریعے سیراب کر کے زرعی پیداوار میں اضافے کے قابل بنانے کی کوشش کریں گے۔
مزید پڑھیں
صدر مملکت نے کہاکہ ملکی ترقی اور صوبوں کو حقوق دینے کے لیے ہمارے دور میں اٹھارویں آئینی ترمیم پاس کی گئی جس سے تمام صوبوں کو فائدہ پہنچا۔
انہوں نے کہاکہ دنیا تیزی کے ساتھ ترقی کر رہی ہے، بلوچستان کے معدنی وسائل کو جدید طریقے سے نکالنے کی ضرورت ہے، یہاں تیل اور گیس موجود ہیں لیکن ہم نے آج تک اس شعبے کو جدید خطوط پر استوار نہیں کیا، اب وقت ہے کہ بلوچستان کے قدرتی وسائل کو نکال کر ملکی معاشی ضروریات کو پورا کیا جا سکے۔
صدر آصف علی زرداری نے کہاکہ بینظیر انکم سپورٹ پروگرام کے ذریعے کم آمدنی والے و حق دار خاندانوں کو پیکیج دے رہے ہیں جس سے غریب خاندانوں کو فائدہ پہنچ رہا ہے، کوشش ہے کہ بینظیر انکم سپورٹ پروگرام کی طرح کے پروگراموں کو مزید وسعت دی جائے ۔
انہوں نے کہاکہ میری کوشش ہے کہ میں پورے ملک خاص کر بلوچستان کی ترقی اور یہاں کے عوام کے لیے زیادہ سے زیادہ کام کر سکوں، بلوچستان کی صوبائی حکومت کو سپورٹ کریں گے کہ وہ یہاں کے عوام کے لیے ترقی کے مواقع پیدا کر سکیں۔
