وزیر منصوبہ بندی و ترقیاتی امور احسن اقبال کل سے چین کا 4 روزہ دورہ کریں گے، دورے کے دوران چائنہ کوآپریشن ایجنسی کی تقریب میں شرکت سمیت اعلیٰ چینی قیادت سے سی پیک منصوبوں اور پاکستان میں چینی باشندوں کی سیکیورٹی پر بات چیت ہو گی۔
سفارتی ذرائع کے مطابق وزیر منصوبہ بندی و ترقیاتی امور احسن اقبال کل سے چین کا 4روزہ دورہ کریں گے دورے کے دوران احسن اقبال خصوصی طور پر چائنہ انٹرنیشنل ڈویلپمنٹ کوآپریشن ایجنسی کی تقریب میں شرکت کریں گے۔
مزید پڑھیں: وفاقی وزیر احسن اقبال کا سوات واقعہ پر ایوان کی خصوصی کمیٹی تشکیل دینے کا مطالبہ
دورہ چین کے دوران باہمی ملاقاتوں کے دوران سی پیک انڈسٹریل زونز اور پاکستان میں چینی باشندوں کی سیکیورٹی کے امور کو زیر بحث لایا جائے گا۔
واضح رہے وزیر منصوبہ بندی احسن اقبال کا دورہ پاکستان چین تعلقات میں استحکام سی پیک کی رفتار میں درپیش رکاوٹوں کے خاتمہ کے تناظر میں ہے۔
یہ بھی واضح رہے کہ گزشتہ ماہ چین کے سینیئر وزیر اور دیگر اعلیٰ عہدیداروں نے پاکستان کا دورہ کیا تھا، اس دوران انہوں نے نائب وزیر اعظم اسحاق ڈار سمیت دیگر عہدیداروں سے ملاقاتوں میں چینی باشندوں کی سیکیورٹی سے متعلق بات چیت کی تھی۔
