کھیت میں گھسنے پر زمیندار نے کلہاڑی کے وار کرکے گدھے کو زخمی کردیا۔ سرگودھا کے نواحی گاؤں ترکھانوالہ میں زمیندار محبوب نواز کےکھیتوں میں ایک گدھا گھس گیا تھا، جس پر زمیندار نے طیش میں آکر گدھےکو ٹانگ میں کلہاڑی مار کر زخمی کردیا۔
پولیس کے مطابق ڈی پی او ڈاکٹر اسد اعجاز کے نوٹس پر چوکی فروکہ پولیس نے فوری کارروائی کرکے ملزم کو گرفتار کرلیا ہے۔ زخمی گدھےکو لائیو اسٹاک اسپتال منتقل کرکے پٹی کروا دی گئی ہے۔
مزید پڑھیں:راولپنڈی: بااثر شخص نے کھیت میں آنے پر گدھی کے کان کاٹ دیے
خیال رہے کہ گزشتہ ماہ سانگھڑ میں سنگ دل وڈیرے نے اپنے کھیت میں داخل ہونے پر اونٹنی کی ٹانگ کاٹ دی تھی۔ وڈیرے نے پہلے ملازمین کے ہمراہ اونٹنی پر تشدد کیا اور پھر تیز دھار آلے سے اس کی ٹانگ کاٹ دی تھی۔
مزید پڑھیں:عمر کوٹ : نامعلوم ملزمان نے اونٹنی کی چاروں ٹانگیں کاٹ کر ہلاک کردیا
گزشتہ ماہ 4 جون کو تھانہ روات کے علاقہ ساگری میں با اثر شخص نے کھیت میں داخل ہونے پر گدھی کے دونوں کان کاٹ دیے تھے، جس کا مقدمہ گدھی کے مالک تنویر حسین کی مدعیت میں درج کرلیا گیا تھا۔
