میٹا نے سابق امریکی صدر ڈونلڈ ٹرمپ کے فیس بک اور انسٹاگرام اکاؤنٹس پر سے پابندیاں ہٹادی ہیں۔ پابندیاں 2021 میں سابق امریکی صدر کے حامیوں کی جانب سے امریکی کیپیٹل پر پرتشدد حملے کے بعد لگائی گئی تھیں۔
خبر رساں ایجنسی ’اے ایف پی‘ کے مطابق میٹا کمپنی کی جانب سے کہا گیا ہے کہ ’ریپبلکن پارٹی کے نامزد امیدوار کے طور پر سابق صدر ڈونلڈ ٹرمپ مزید معطلی کی سزاؤں کے تابع نہیں ہوں گے۔‘
ڈونلڈ ٹرمپ کے فیس بک اور انسٹاگرام اکاؤنٹس کو 6 جنوری 2021 کو ان کے حامیوں کے امریکی کیپیٹل پر حملے کے ایک دن بعد غیر معینہ مدت کے لیے معطل کر دیا گیا تھا، کیوں کہ انہوں نے سوشل میڈیا پر تشدد میں شامل لوگوں کی تعریف کی تھی۔
مزید پڑھیں:ڈونلڈ ٹرمپ پر فائرنگ کے بعد ان کے بڑے بیٹے نے کیا دعویٰ کیا؟
فروری 2023 میں ان کے اکاؤنٹس کو مستقبل میں خلاف ورزیوں کے لیے جرمانے کے خطرے کے ساتھ بحال کر دیا گیا تھا، تاہم میٹا نے اب یہ اضافی پابندی ہٹالی ہے۔ میٹا نے بلاگ پوسٹ میں لکھا ہے کہ ہم سمجھتے ہیں کہ امریکی عوام کو ایک ہی بنیاد پر صدر کے لیے نامزد امیدواروں کے مؤقف کو سننے کا موقع ملنا چاہیے۔
پوسٹ میں مزید کہا گیا ہے کہ امریکی صدارتی امیدوار سب فیس بک اور انسٹاگرام صارفین کی طرح کمیونٹی معیارات کے تابع ہیں، بشمول وہ پالیسیاں جو نفرت انگیز تقاریر اور تشدد پر اکسانے کے خلاف بنائی گئی ہیں۔
مزید پڑھیں:ڈونلڈ ٹرمپ انتخابی ریلی میں فائرنگ سے زخمی، حملہ آور ہلاک، عینی شاہدین نے کیا دیکھا؟
کسی جرم میں سزا پانے والے پہلے سابق امریکی صدر ڈونلڈ ٹرمپ پر ایکس اور یوٹیوب پر بھی پابندی لگا دی گئی تھی، تاہم یہ پابندیاں گزشتہ برس ہٹالی گئی تھیں۔