راولپنڈی کی سول عدالت نے تحریک انصاف کے رکن قومی اسمبلی شیرافضل مروت کے ناقابل ضمانت وارنٹ گرفتاری جاری کردیے ہیں۔
شیر افضل مروت کے ناقابلِ ضمانت وارنٹ گرفتاری سول جج ڈاکٹر محمد ممتاز ہنجرا نے ان کی عدالت میں غیر حاضری پر جاری کیے ہیں، رکن قومی اسمبلی کیخلاف تھانہ نصیرآباد میں راولپنڈی ڈیولپمنٹ اتھارٹی یعنی آر ڈی اے نے مقدمہ کررکھا ہے۔
عدالتی حکم کے مطابق وارنٹ گرفتاری شیرافضل مروت اور ان کے وکیل کے عدالت حاضر نہ ہونے پرجاری کیے گئے ہیں۔
واضح رہے کہ شیرافضل مروت نے 2023 میں آرڈی اے پر اپنے گھرمسمار کرنے کا الزام عائد کیا تھا جبکہ راولپنڈی ڈیولپمنٹ اتھارٹی نے مؤقف اپنایا تھا کہ شیر افضل مروت جس پراپرٹی کی بات کررہے ہیں، وہ اسکیم ہی غیرقانونی ہے، نوٹسز کا جواب نہ دینے پر مالکان کےخلاف بھی مقدمہ درج کیا گیا ہے۔
