لاہور ہائیکورٹ میں پی ٹی آئی کے سوشل میڈیا انچارج اظہر مشوانی کو حبس بیجا میں رکھنے کے خلاف اور مقدمات کی تفصیلات حاصل کرنے کےلیے درخواست دائر کردی گئی۔
درخواست مظیر مشوانی نے اظہر صدیق ایڈووکیٹ کے توسط سے دائر کی۔ درخواست میں آئی جی پنجاب، ڈائریکٹر جنرل ایف آئی اے کو فریق بنایا گیا ہے۔
درخواست میں موقف اختیار کیا گیا ہے کہ اظہر مشوانی کو گھرجاتے ہوئے نامعلوم افراد اٹھا کرلے گئے۔ خدشہ ہے کہ اظہر مشوانی کو پولیس نے حبس بیجا میں رکھا ہے۔ ان کے خلاف متعدد مقدمات درج کرنے کی اطلاعات موصول ہوئی ہیں۔
درخواست میں بتایا گیا ہے کہ تمام فریقین کو مقدمات کی معلومات فراہم کرنے کے لیے خط لکھا گیا لیکن کسی ادارے نے معلومات مہیا نہیں کیں۔ درخواست میں استدعا کی گئی کہ عدالت اظہر مشوانی کو بازیاب کرانے کا حکم دے۔
