190 ملین پاؤنڈ اسکینڈل کے حوالے سے سابق وزیراعظم عمران خان کے پرنسپل سیکریٹری اعظم خان نے اپنے بیان میں کہا ہے کہ مذکورہ معاملہ وفاقی کابینہ میں پیش کیا گیا تھا تاہم وہ اس میٹنگ میں شریک نہیں ہوئے تھے اس لیے وہاں کیا بحث ہوئی اس سے آگاہ نہیں۔
اپنے بیان میں انہوں نے کہا کہ شہزاد اکبر ان کے پاس اپنا دستخط شدہ ایک نوٹ لے کر آئے تھے جو خفیہ معاہدے پر دستخط کا معاملہ کابینہ میں لانے کے لیے وزیرِ اعظم کی منظوری لینے سے متعلق تھا۔
یہ بھی پڑھیں: سائفر کیس: پی ٹی آئی کے اصرار پر اعظم خان کا قرآن پر حلفیہ بیان، معاملے کی روداد سنادی
اعظم خان نے بتایا کہ شہزاد اکبر نے ان سے کہا کہ بانی پی ٹی آئی عمران خان نے نوٹ کو کابینہ میں پیش کرنے کی اجازت دے دی ہے۔ انہوں نے کہا کہ میں نے وہ فائل سیکریٹری کابینہ کے حوالے کر دی تاہم میں نے کابینہ میٹنگ میں ان کیمرہ اجلاس ہونے کی وجہ سے شرکت نہیں کی۔
سابق پرنسپل سیکریٹری نے کہا کہ میں اگست 2018ء سے اپریل 2022ء تک پرنسپل سیکریٹری کے طور پر تعینات رہا تھا اور معاہدے پر ہونے والے دستخط کو میں نے پہچان لیا تھا۔ انہوں نے مزید کہا کہ معاہدے کے ساتھ ایک خفیہ تحریر موجود تھی جس سے متعلق بتایا نہیں گیا تھا۔
مزید پڑھیے: پرویز خٹک کی گواہی، عمران خان کے خلاف 190 ملین پاؤنڈ ریفرینس میں کیا نیا موڑ لائے گی؟
اعظم خان نے 13 جولائی کو احتساب عدالت کے جج محمد علی وڑائچ کے روبرو بیان ریکارڈ کروایا تھا۔ ان سے بیان پر جرح اب 20 جولائی کو ہوگی۔
یاد رہے کہ اس سے قبل پرویز خٹک اور سابق وفاقی وزیر زبیدہ جلال بھی 190 ملین پاؤند کیس میں اپنا بیان عدالت میں جمع کروا چکے ہیں۔
