پاکستان کرکٹ بورڈ (پی سی بی) نے بابر اعظم، محمد رضوان اور شاہین شاہ آفریدی کو گلوبل ٹی20 لیگ کے لیے این او سی نہ جاری کرنے کا فیصلہ کیا ہے، تینوں کھلاڑیوں نے گلوبل ٹی20 لیگ کے لیے این اوسی کی درخواست دی تھی۔
پی سی بی کی جانب سے تینوں کھلاڑیوں کو این او سی جاری نہ کرنے کا فیصلہ غیرمعمولی مصروف سیزن اور کھلاڑیوں کے ورک لوڈ کو مدنظر رکھ کر کیا گیا ہے۔ ترجمان پی سی بی نے بتایا کہ بورڈ کو تینوں کھلاڑیوں کی جانب سے این او سی کی درخواستیں موصول ہوئی تھیں۔
یہ بھی پڑھیں: آئی سی سی ٹیسٹ بیٹرز رینکنگ میں بابر اعظم کس نمبر پر پہنچ گئے؟
ترجمان کے مطابق پاکستان کرکٹ بورڈ نے قومی ٹیم کی غیرمعمولی مصروفیات اور تینوں کھلاڑیوں اور سیلیکشن کمیٹی سے مشاورت کے بعد انہیں این او سی جاری نہ کرنے کا فیصلہ کیا ہے۔
ترجمان کے مطابق تینوں کھلاڑی تینوں فارمیٹ کے کرکٹرز ہیں اور پاکستان کو آئندہ 8ماہ کے دوران ان کی خدمات درکار ہوں گی۔ اس لیے پی سی بی نے فیصلہ کیا ہے کہ کینیڈا میں ہونے والے ایونٹ میں یہ کھلاڑی حصہ نہ لیں۔
یہ بھی پڑھیں: سینٹرل کانٹریکٹ کن کھلاڑیوں کو ملے گا، پی سی بی چیئرمین محسن نقوی نے وضاحت کردی
انہوں نے بتایا کہ پی سی بی کی ورک لوڈ مینجمنٹ پالیسی کے پیش نظر یہ پاکستان کرکٹ اور تینوں کھلاڑیوں کے بہترین مفاد میں ہے کہ غیر ملکی لیگ میں حصہ نہ لیں، اور قومی کرکٹ پر توجہ مرکوز رکھیں۔
