گورنر خیبرپختونخوا فیصل کریم کنڈی نے کہا ہے کہ وزیراعلیٰ علی امین گنڈاپور خود بھتہ دے رہے ہیں، ہمارے دور میں صوبے میں امن تھا۔
میڈیا سے گفتگو کرتے ہوئے فیصل کریم کنڈی نے کہاکہ 2012 کے خیبرپختونخوا اور اب کے خیبرپختونخوا میں بہت فرق ہے، وزیراعلیٰ کو بنوں واقعہ کے فوری بعد وہاں جانا چاہیے تھا۔
یہ بھی پڑھیں وزیراعلیٰ خیبر پختونخوا علی امین کی گورنر فیصل کنڈی کو نئی دھمکی
انہوں نے کہاکہ مولانا فضل الرحمان کہتے ہیں شام کو ڈی آئی خان میں کوئی گھر سے نہیں نکل سکتا، ہم بھی کہتے ہیں کہ بد امنی بہت بڑھ گئی ہے۔
گورنر نے کہاکہ بنوں واقعہ کے بعد سوشل میڈیا پر فیک خبریں چلیں جس سے پریشانی بڑھی، پولیس اور پاک فوج کے خلاف نعرے لگانے والوں کے خلاف کارروائی کرنی چاہیے۔
انہوں نے کہاکہ جو پاکستان کے آئین اور قانون کو نہیں مانتا اس کے خلاف کارروائی کی جائے، پہلے بھی مشورہ دیا تھا کہ ایپکس کمیٹی کا اجلاس طلب کیا جائے۔
انہوں نے کہاکہ گورنر کے پاس کیا اختیارات ہیں اس کا مجھے علم ہے، وہ کوئی نہیں لے سکتا۔
یہ بھی پڑھیں وزیراعلیٰ خیبرپختونخوا کا گورنر فیصل کریم کنڈی کو ایک ارب روپے ہرجانے کا نوٹس
فیصل کریم کنڈی نے کہاکہ وزیراعلیٰ کے ضلع میں جج اغوا اور پولیس پر حملے ہورہے ہیں، امن و امان پر کوئی سیاست نہیں ہونی چاہیے۔
انہوں نے کہاکہ جرگہ تو وزیراعلیٰ کے پاس آیا ہے، اس کی تحقیقات ہونی چاہییں کہ ریاست کے خلاف کس نے نعرے بازی کروائی۔
