بھارت کے سابق اسپن بولر ہربھجن سنگھ نے چیمپئنز ٹرافی 2025 کے لیے بھارتی ٹیم کے پاکستان آنے سے متعلق زہر افشانی شروع کر دی ہے۔ سابق کرکٹر نے بھارتی ٹیم کی ٹورنامنٹ میں شرکت اور پاکستان جانے کی تصدیق کرنے سے پہلے حکومت سے منظوری لینے کے بھارتی بورڈ کے فیصلے کی حمایت کی ہے۔
بھارتی میڈیا سے بات کرتے ہوئے ہربھجن سنگھ نے کہا ہے کہ مجھے کوئی اس بات کا جواب دے دے کہ بھارتی ٹیم پاکستان کیوں جائے؟ پاکستان میں حفاظت کے خدشات ہیں، وہاں کے حالات ایسے ہیں کہ قریباً ہر روز حادثات ہوتے رہتے ہیں، وارداتیں ہوتی ہیں۔
مزید پڑھیں:’بھارتی شائقین پاکستانی کھلاڑیوں کو آئی پی ایل میں نہیں دیکھنا چاہتے‘ ہربھجن سنگھ
ہرزہ سرائی کرتے ہوئے ان کا کہنا تھا کہ میں نہیں سمجھتا کہ وہاں جانا بھارتی ٹیم کے لیے محفوظ ہے اور بی سی سی آئی کا مؤقف بالکل درست ہے، ہمارے کھلاڑیوں کی حفاظت سے زیادہ کوئی چیز اہم نہیں ہے، میں کرکٹ بورڈ کے مؤقف کی حمایت کرتا ہوں۔
بھارتی کرکٹ بورڈ نے اس معاملے پر تبصرہ کرنے سے گریز کیا اور کہا ہے کہ حکومت ٹیم کے پاکستان جانے سے متعلق فیصلہ کرے گی۔ آئی سی سی چیمپئنز ٹرافی فروری 2025 میں پاکستان میں شیڈول ہے۔
