وفاقی تحقیقاتی ادارے (ایف آئی اے) نے افغان شہریوں کو شناختی کارڈ جاری کرنے میں ملوث نادرا کے اسسٹنٹ ڈائریکٹر کو کراچی سے گرفتار کرلیا ہے۔
ترجمان ایف آئی اے کے مطابق ملزم نے ساتھیوں کے ساتھ مل کر افغان شہریوں کو پاکستانی شناختی کارڈ جاری کیے تھے، ملزم کے دیگر ساتھیوں کی گرفتاری کے لیے کوششیں جاری ہیں۔ ملزم سے تفتیش جاری ہے عدالت میں پیش کرنے کے بعد ریمانڈ لینے کی کوشش کی جائے گی۔ ترجمان کے مطابق تفتیش میں ہونے والی پیشرفت کی بنیاد پر مزید کاروائیاں بھی کی جائیں گی۔
مزید پڑھیں:نادرا نے شناختی کارڈ کی ارجنٹ ڈیلیوری کو بغیر اضافی فیس کے مزید ارجنٹ کردیا
ترجمان کے مطابق ایف آئی اے کی ایک اور کارروائی کے دوران غیر قانونی ٹریول ایجنسی کے دفتر پر چھاپا مار کر ایک ملزم کو گرفتار کرکے متعدد شناختی اور سفری دستاویزات برآمد کیے گئے ہیں۔ لیاری میں غیر قانونی ٹریول ایجنسی کے دفتر پر چھاپے کے دوران گرفتار ملزم کے قبضے سے متعدد پاسپورٹس اورشناختی کارڈ برآمد کیے گئے، دوران تلاشی ٹریول ایجنسی کے دفتر سے لیپ ٹاپ اور دیگر سفری دستاویزات بھی برآمد کیے گئے ہیں۔
