پیرس اولمپکس میں میڈلز کی دوڑ میں آسٹریلیا 3 گولڈ میڈلز کے ساتھ پوائنٹ ٹیبل پر سرفہرست اور چین 2 میڈل کے ساتھ دوسرے نمبر پر ہے۔ بیلجیئم، جرمنی، جاپان، امریکا، فرانس، قازقستان، ہانگ کانگ اور کوریا نے بھی ایک ایک گولڈ میڈل حاصل کیا ہے۔
شوٹنگ ایونٹ میں چین نے پیرس اولمپکس کا پہلا گولڈ میڈل جیتا، چین کی ٹیم نے 10 میٹر ایئر رائفل میں سونے کا تمغہ حاصل کیا، کوریا نے چاندی اور قازقستان نے کانسی کا تمغہ حاصل کیا۔ چین نے دوسرا گولڈ میڈل ڈائیونگ کے مقابلوں میں حاصل کیا، اس ایونٹ میں امریکا نے چاندی اور برطانیہ نے کانسی کا تمغہ حاصل کیا۔
آسٹریلیا نے خواتین کی 400 میٹر فری اسٹائل میں گولڈ میڈل جیتا، کینیڈا نے سلور اور امریکا نے برانز میڈل جیتا۔ آسٹریلیا نے تیسرا گولڈ میڈل خواتین کی x100 4 ریلے میں حاصل کیا، آسٹریلین ٹیم نے 3:28.92 ٹائمنگ کیساتھ نیا اولمپکس ریکارڈ بنایا۔ امریکا نے سلور اور چین نے برانز میڈل جیتا۔
مزید پڑھیں:پیرس اولمپکس میں پاکستانی شوٹرز کی مایوس کن کارکردگی
مینز روڈ سائیکلنگ میں بیلجئم نے گولڈ میڈل جیتا، آسٹریلیا نے انفرادی ٹائم ٹرائلز میں طلائی تمغہ حاصل کیا۔ جاپان کو جوڈو کے مقابلوں میں گولڈ میڈل ملا، جاپان کی ناتسومی نے منگولیا کی ایتھلیٹ کو ہرا کر طلائی تمغہ حاصل کیا۔
خواتین کے 48 کلوگرام جوڈو میں جاپان نے گولڈ میڈل اور منگولیا نے سلور میڈل جیتا۔ برانز میڈلز کی باؤٹس میں سوئیڈن کی تارابابالفتح اور فرانس کی شیری بولکی نے کامیابیاں سمیٹیں۔
امریکا نے اپنا پہلا گولڈ میڈل مردوں کیx100 4 فری اسٹائل ریلے میں حاصل کیا، آسٹریلیا ایک عشاریہ صفر 7 سیکنڈ کے فرق سے چاندی کا حقدار ہوا جبکہ اٹلی کی ٹیم نے برانز میڈل اپنے نام کیا۔ ہانگ کانگ نے پہلا گولڈ میڈل خواتین کے فینسنگ مقابلوں میں جیتا، ہانگ کانگ نے برانز میڈل میں ہنگری نے اسٹونیا کے کھلاڑی کو شکست دی۔
جرمنی نے بھی اپنا پہلا طلائی تمغہ جیت لیا، مارٹن لوکاز نے مردوں کی 400 میٹر فری اسٹائل سوئمنگ میں گولڈ جیتا، آسٹریلیا نے سلور اور کوریا نے برانز میڈل جیتا۔
مزید پڑھیں:پیرس: دریائے سین پر رنگارنگ افتتاحی تقریب، اولمپکس کا آغاز ہوگیا
پیرس اولمپکس میں پہلے دن کا آخری گولڈ میڈل کوریا نے اپنے نام کیا، جنوبی کوریا کے او سینگوک نے مینز فینسنگ سیبر میں گولڈ میڈل جیتا، فائنل میں او سینگوک نے تیونس کے فارس فرجانی کو شکست دی، اسی طرح برانز میڈل کا مقابلہ اٹلی کے لوگی سیمل نے اپنے نام کیا۔
اس کے علاوہ پیرس اولمپکس میں میزبان فرانس بھی گولڈ میڈل جیتنے میں کامیاب ہوا ہے۔ فرانس نے فجی کو ہرا کر رگبی 7 میں گولڈ میڈل جیت لیا۔ رگبی 7 میں جنوبی افریقا نے آسٹریلیا کو ہراکر برانز میڈل جیتا۔
پاکستانی شوٹرز 10 میٹر ایئرپسٹل مقابلوں کے فائنل راؤنڈ میں جگہ نہ بنا سکے
پیرس اولمپکس شوٹنگ مقابلوں میں پاکستان کے گلفام جوزف اور کشمالہ طلعت 10 میٹر ائیر پسٹل مقابلوں کے فائنل راؤنڈ میں جگہ نہ بناسکے۔ مردوں کی 10 میٹر ایئرپسٹل شوٹنگ میں گلفام جوزف اپنا ریکارڈ برقرار نہ رکھ سکے اور 33 میں سے 22 ویں نمبر پر رہے۔
دوسری سیریز میں گلفام نے 9 ٹارگٹ مس کیے اور صرف 91 پوائنٹس حاصل کرسکے جس کی وجہ سے ان کی پوزیشن کافی متاثر ہوئی۔ ان کا مجموعی اسکور 571 رہا۔
مزید پڑھیں:پیرس اولمپکس کھیلنے کے لیے اپنی انگلی کٹوانے والا کھلاڑی کون ہے؟
خواتین کی 10 میٹر ایئرپسٹل میں کشمالہ طلعت بھی نمایاں کارکردگی کا مظاہرہ نہ کرسکیں۔ انہوں نے 6 سیریز میں مجموعی طور پر 567 پوائنٹس حاصل کیے۔ کشمالہ نے پہلی سیریز میں 93، دوسری میں 97، تیسری میں 94 پوائنٹس حاصل کیے۔ آخری 3 سیریز میں پاکستانی شوٹر 93، 95 اور 95 پوائنٹس حاصل کیے اور مجموعی طور پر وہ 31 ویں نمبر پر رہیں۔
کشمالہ اور گلفام جوزف 29 جولائی کو مکسڈ ٹیم کے ایونٹ میں بھی شریک ہوں گے، کشمالہ طلعت خواتین کی 25 میٹر پسٹل مقابلوں میں بھی شریک ہوں گی۔
