اولمپکس کھیلنے کا ایسا حیرت انگیز جذبہ آپ نے پہلے کبھی نہ سنا ہوگا نہ ہی دیکھا ہوگا۔ آسٹریلیا کے اسٹار ہاکی کھلاڑی میٹ ڈاسن نے پیرس اولمپکس 2024 میں شرکت کے لیے اپنی انگلی کٹوا دی ہے۔
میڈیا رپورٹس کے مطابق آسٹریلوی ہاکی اسٹار میٹ ڈاسن نے 26 جولائی 2024 سے شروع ہونے والے پیرس اولمپکس گیمز میں شرکت کے لیے اپنی انگلی کا ایک حصہ کاٹ لیا ہے۔ ٹوکیو گیمز میں چاندی کا تمغہ جیتنے والے 30 سالہ کھلاڑی کو ایک مشکل فیصلے کا سامنا کرنا پڑا تھا۔
دراصل ڈاسن کے دائیں ہاتھ کی انگوٹھی میں فریکچر ہوا تھا جس سے اس کی پیرس اولمپکس میں شرکت مشکوک ہوگئی تھی۔ انجری کے بعد ان کے پاس 2 آپشن تھے، ایک انگلی کو قدرتی طور پر ٹھیک ہونے دینا، جس سے ان کی پیرس گیمز میں شرکت غیر یقینی ہو جائے گی، اور دوسرا انگلی کا کچھ حصہ کاٹ کر ایونٹ میں یقینی طور پر شرکت کرنا تھا۔
مزید پڑھیں:پاکستانی شوٹر کشمالہ طلعت نے پیرس اولمپکس کے لیے کوالیفائی کرلیا
ڈاسن نے دنیا کے سب سے بڑے کھیلوں کے ایونٹ میں اپنے ملک کی نمائندگی کرنے کے لیے اپنے جوش و جذبے کا مظاہرہ کرتے ہوئے دوسرے آپشن کا انتخاب کیا۔ انہوں نے آسٹریلوی نشریاتی ادارے سیون نیٹ ورک کو بتایا کہ میرے پاس فیصلہ کرنے کے لیے زیادہ وقت نہیں تھا۔
انہوں نے مزید کہا کہ مجھے لگتا ہے کہ میرے پاس وہ تمام معلومات موجود تھیں جن کی مجھے نہ صرف پیرس میں کھیلنے بلکہ اس کے بعد کی زندگی کے بارے میں فیصلہ کرنے اور خود کو بہترین صحت دینے کے لیے درکار تھیں۔
فیلڈ ہاکی میں مضبوط ٹیموں میں سے ایک، آسٹریلیا گزشتہ ایڈیشن سے اپنی کارکردگی بہتر بنانے کی کوشش کرے گی، جب اس نے چاندی کا تمغہ جیتا تھا۔ آسٹریلوی مردوں کی ہاکی ٹیم دنیا میں چوتھے نمبر پر ہے اور وہ اولمپکس مہم کا آغاز 27 جولائی کو ارجنٹائن کے خلاف میچ سے کرے گی۔
