فلسطین کی مزاحمتی تنظیم حماس نے اسماعیل ہنیہ کی شہادت کے بعد غزہ کے رہنما یحییٰ السنوار کو سیاسی شعبے کا سربراہ نامزد کردیا۔
واضح رہے کہ حماس کے سیاسی شعبہ کے سربراہ اسماعیل ہنیہ کو 31 اکتوبر کو ایران میں ایک میزائل حملے میں اس وقت شہید کردیا گیا تھا جب وہ نومنتخب ایرانی صدر کی تقریب حلف برداری میں شرکت کے لیے وہاں موجود تھے۔
یہ بھی پڑھیں اسماعیل ہنیہ کے خون کا بدلہ لینا ہم پر فرض ہے، ایرانی سپریم لیڈر خامنہ ای
اسماعیل ہنیہ کی شہادت پر جہاں پاکستان سمیت دیگر ممالک نے اسرائیل کی مذمت کی وہیں ایران نے ان کے قتل کا بدلہ لینے کا اعلان کیا ہے۔
یہ بھی یاد رہے کہ 7 اکتوبر 2023 کو حماس کے ایک آپریشن کے بعد اسرائیل اور حماس کے درمیان شروع ہونے والی لڑائی اب تک جاری ہے، جس میں 40 ہزار سے زیادہ فلسطینی شہید ہوچکے ہیں۔
حماس کے نئے سربراہ یحییٰ سنوار کون ہیں؟
حماس کے نئے سربراہ منتخب ہونے والے یحییٰ السنوار کی عمر تقریباً 62 برس ہے اور وہ امریکا کو سب سے زیادہ مطلوب افراد کی فہرست میں شامل ہیں۔
یحییٰ السنوار پر الزام ہے کہ 7 اکتوبر کے روز حماس کی جانب سے اسرائیل کے خلاف کیے گئے آپریشن کی منصوبہ بندی بھی انہوں نے ہی کی تھی۔ یہ حملہ اسرائیل کی تاریخ میں ریاست پر کیا جانے والا سب سے خطرناک حملہ تھا، جس میں 1200 افراد ہلاک ہوگئے تھے۔
19 اکتوبر 1962 کو خان یونس کے ایک کیمپ میں آنکھ کھولنے والے یحییٰ ابراہیم حسن السنوار نے ابتدائی تعلیم خان یونس کے اسکول میں ہی حاصل کی اور پھر غزہ کی اسلامک یونیورسٹی سے عربی میں بیچلر کی ڈگری حاصل کی، انہوں نے 5 سال تک یونیورسٹی کی اسٹوڈنٹ کونسل میں خدمات انجام دیں اور پھر کونسل کے چیئرمین اور وائس چیئرمین بھی رہے۔
یحییٰ السنوار نے 23 سال تک اسرائیل کی مختلف جیلوں میں قید کاٹنے کے دوران انہوں نے عبرانی زبان میں خوب مہارت حاصل کرلی، ان کے بارے میں مشہور ہے کہ وہ اسرائیلی ثقافت اور معاشرے میں بارے میں گہری سوجھ بوجھ بھی رکھتے ہیں۔
حماس کے رہنما کو 2 اسرائیلی فوجیوں کے قتل کے جرم میں 4 مرتبہ عمر قید کی سزا سنائی گئی تھی، تاہم وہ 2011 میں اس وقت رہا ہوگئے جب اسرائیلی فوجی گیلاد شالیت کی رہائی سے متعلق معاہدہ ہوا تھا۔
یہ بھی پڑھیں کیا اسماعیل ہنیہ کے بیڈ کے نیچے بم رکھا گیا تھا؟ حماس رہنما خالد قدومی نے اہم انکشافات کردیے
اس وقت جن 1027 قیدیوں کی رہائی عمل میں آئی تھی ان میں یحییٰ سنوار سب سے سینیئر قیدی تھے۔ اسرائیل کی قید سے رہائی کے بعد یحییٰ السنوار القسام بریگیڈز کے سینیئر کمانڈر بن گئے تھے۔
