بنگلہ دیش حکومت نے ان میڈیا رپورٹس کو مسترد کر دیا ہے جن میں دعویٰ کیا گیا تھا کہ ملک میں انڈین پریمیئر لیگ (آئی پی ایل) کی نشریات پر عائد پابندی ختم کردی گئی ہے۔
بنگلہ دیش کی وزارت اطلاعات و نشریات کی جانب سے جاری سرکاری بیان میں کہا گیا کہ بعض میڈیا اداروں، بشمول ڈیلی اسٹار، میں شائع ہونے والی حالیہ خبریں درست نہیں اور ان سے عوام میں غلط فہمی پیدا ہوئی۔
یہ بھی پڑھیں: بھارت اور بنگلہ دیش کے درمیان تنازع بڑھ گیا، ڈھاکہ میں آئی پی ایل کی نشریات پر پابندی عائد
وزارت اطلاعات و نشریات کے ترجمان عمران الحق حسن نے وضاحتی بیان جاری کرتے ہوئے کہا کہ سابق حکومت کی جانب سے آئی پی ایل کی نشریات معطل کرنے کا فیصلہ تاحال برقرار ہے۔
بیان کے مطابق اس معاملے پر وزارتِ امورِ نوجوانان و کھیل کو باضابطہ طور پر رائے دینے کے لیے درخواست ارسال کی گئی ہے، اور آئندہ کسی بھی فیصلے کا انحصار اس وزارت کی سفارشات پر ہوگا۔
یہ بھی پڑھیں: ہمارا مقصد بنگلہ دیش کو عزت دلانا تھا،اس معاملے میں ہمارا کوئی ذاتی مفاد نہیں : محسن نقوی
حکام نے واضح کیا کہ آئی پی ایل کی نشریات سے متعلق کوئی حتمی فیصلہ متعلقہ اداروں کی مشاورت کے بعد ہی کیا جائے گا۔
وزارت نے میڈیا اداروں سے اپیل کی کہ عوامی ابہام دور کرنے کے لیے سرکاری وضاحت کو فوری طور پر نشر کیا جائے۔
